საზოგადოება

საქართველოში ჰაერში ტყვიის შემცველობა ევროპულ დონეს ხუთჯერ ჩამოუვარდება - ნოე მეგრელიშვილი

გარემოს დაცვისა და სოფლის მეურნეობის სამინისტროს ატმოსფერული ჰაერის სამმართველოს ხელმძღვანელის, ნოე მეგრელიშვილის ინფორმაციით, საქართველოში ჰაერში ტყვიის შემცველობა ევროპულ დონეს ხუთჯერ ჩამოუვარდება და ამ მხრივ პრობლემა პრაქტიკულად არ არსებობს.

მისივე თქმით, გარემოს ეროვნული სააგენტო ლაბორატორიული ანალიზით ჰაერში ტყვიის შემცველობას იკვლევს. მეგრელიშვილმა მცდარი უწოდა ინფორმაცია, რომ ჰაერში ტყვია ფიქსირდება და გამორიცხა ტყვიის საწვავში არსებობაც.

უწყების წარმომადგენლის თქმით, ქვეყანაში 2005 წლიდან აკრძალულია ტყვიის შემცველი ბენზინის მოხმარება და ბოლო წლებში ჩატარებულ არცერთი კვლევით, იქნება ეს არასამთავრობო სექტორის მონაცემები, ჟურნალისტური გამოძიება თუ სახელმწიფო კონტროლი, ტყვიის დასაშვებზე მეტი შემცველობა ჰაერში არ დაფიქსირებულ მეგრელიშვილის თქმით, მოსაძებნია ტყვიის წყაროები.

„ტყვიის წყაროებს სწორად უნდა მივაგნოთ და პრობლემა ვეძებოთ იქ, სადაც ამის ყველაზე მაღალი ალბათობაა – სათამაშოებში, საღებავებში. იყო შემთხვევა, როდესაც ადამიანი დააპატიმრეს იმის გამო, რომ სუნელების რაოდენობას საღებავებით ზრდიდა“, – განაცხადა მეგრელიშვილმა.

მეგრელიშვილის ინფორმაციით, ჰაერში გოგირდის დიოქსიდის შემცველობაც დაბალია და ასეთი მცირე კონცენტრაციის მიზეზი ისაა, რომ 2012 -2017 წლებში ბენზინში გოგირდის შემცველობა 25-ჯერ შემცირდა და დღეს მოხმარებულ საწვავში ამ ნივთიერების შემცველობა ულტრამცირეა, ერთ კილოგრამ ბენზინზე 10 მილიგრამზე ნაკლები.

მეგრელიშვილის თქმით, დედაქალაქშიც კი გოგირდის შემცველობა ევროპულ დონეზე გაცილებით დაბალია. რაც შეეხება ბენზოლს, მისივე განცხადებით, მცირე დარღვევები ამ კუთხითაც ერთეულ შემთხვევაში დაფიქსირდა. როგორც მეგრელიშვილმა განაცხადა, დედაქალაქსა და მთელ ქვეყანაში მთავარი დამბინძურებელია აზოტის დიოქსიდი, რაც ტექნიკურად გაუმართავი ავტომობილების გამონაბოლქვის შედეგია და ასევე, მთავარი დამბინძურებელი მყარი ნაწილაკები – მტვერია.