მსოფლიო
საქართველოში სამველ ბაბაიანის თანამზრახველი დააკავეს
საქართველოს კრიმინალური პოლიციის თანამშრომლებმა თბილისში ნიკოლოზ ბარათაშვილის აღმართისა და ღვინის აღმართის გადაკვეთაზე, სომხეთის პოლიციის მიერ ძებნილი 1977 წელს დაბადებული რობერტ ა. დააკავეს.
სომხური მედიის ინფორმაციით, სომხეთის პოლიციის მთავარი სამმართველო 40 წლის რობერტ ა.-ს საზენიტორ-სარაკეტო კომპლექსის „იგლას“ საქმისთვის ყავდა ძებნაში გამოცხადებული.
სომხეთის პოლიციის მთავარი სამმართველო რობერტ ა.–ს სომხეთის სისხლის სამართლის კოდექსის 235-ე მუხლის მე-2 ნაწილით და 235,1 მუხლის მე-2 ნაწილის 1-ლი პუნქტით გათვალისწინებული დანაშაულისათვის ეძებდა, რაც იარაღის, საბრძოლო მასალის, ასაფეთქებელი ნივთიერებისა და ასაფეთქებელი მოწყობილობის უკანონო შეძენა, შენახვა, რეალიზაციას, გადატანა, ან ტარებას გულისხმობს.
შეგახსენებთ, რომ 21 მარტს სომხეთის ეროვნული უსაფრთხოების სამსახურმა საზღვარზე „იგლას“ შეტანის ფაქტი აღკვეთა. უწყების ინფორმაციით, რაკეტა კონტრაბანდისტული გზით საქართველოს გავლით შედიოდა.
საქმეზე ორი პირია დაკავებული, მათ შორის არის მთიანი-ყარაბაღის ყოფილი თავდაცვის მინისტრი სამველ ბაბაიანი.
სომხეთი ეროვნული უსაფრთხოების სამსახურის ინფორმაციით, სწორედ ბაბაიანის დაკვეთითა და მითითებით მოქმედებდნენ დანარჩენი პირები.
ამასთან, როგორც საქართველოს შინაგან საქმეთა მინისტრმა გიორგი მღებრიშვილმა საკითხის კომენტირებისას განაცხადა, ჯერჯერობით „რთულია საუბარი იმაზე, რომ „იგლა“ სომხეთში საქართველოდან შედიოდა“.
მონიკა დავლიანიძე