პოლიტიკა

სასამართლო იმართება კონკრეტული ჯგუფის მიერ და ეს უფრო საშიშ ფორმებს იღებს - ნაზი ჯანეზაშვილი

იუსტიციის უმაღლესი საბჭოს არამოსამართლე წევრი ნაზი ჯანეზაშვილი გამოეხმაურა ბათუმის საქალაქო სასამართლოს მოსამართლის, ირაკლი შავაძის განცხადებას, რომელმაც დახმარება სთხოვა არსამთავრობო სექტორს. შავაძემ ბათუმის საქალაქო სასამართლოს თავმჯდომარე დავით მამისეიშვილი ზეწოლაში დაადანაშაულა და არ გამორიცხა, რომ მამისეიშვილის გამო იუსტიციის უმაღლესმა საბჭომ ის უვადო მოსამართლედ არ გაამწესა.

კითხვაზე, რამდენად საგანგაშოა ეს განცხადება, ჯანეზაშვილმა უპასუხა, რომ სასამართლო სისტემა იმართება კლანური ჯგუფის მიერ, რაც საშიშ ფორმებს იღებს.

„სასამართლო რომ იმართება კლანისგან, ამას მოწმობს თუნდაც დღეს წარმოდგენილი კანდიდატები, რომლებიც დასახელებულნი არიან იუსტიციის უმაღლეს საბჭოში თბილისის სააპელაციო სასამართლოს სისხლის სამართლის საქმეთა პალატის თავმჯდომარის თანამდებობაზე. ვნახოთ, საბჭო ვის აირჩევს და რა გადაწყვეტილებას მიიღებს, მაგრამ დღითიდღე უფრო ვრწმუნდებით არა მხოლოდ იუსტიციის უმაღლესი საბჭოს წევრები, არამედ საზოგადოებაც, რომ სასამართლო იმართება კონკრეტული ჯგუფის მიერ და ეს უფრო საშიშ ფორმებს იღებს“, -თქვა ჯანეზაშვილმა.