კომენტარი

სასამართლო სისტემასთან დაკავშირებით არასამთავრობო სექტორს სამართლიანი მოთხოვნები აქვს - სერგი კაპანაძე

არასამთავრობო სექტორი იუსტიციის უმაღლესი საბჭოს დაშლას ითხოვს, ასევე ითხოვს, რომ თანამდებობებიდან გადადგნენ ლევან მურუსიძე და მიხეილ ჩინჩალაძე. ამასთან, საქართველოს პარლამენტს მიმართავენ, საზოგადოების ჩართულობით შექმნას ისეთი რეგულაციები, რომელიც უზრუნველყოფს მოსამართლედ საუკეთესო კანდიდატის შერჩევას.

პარლამენტის ვიცე-სპიკერის, სერგი კაპანაძის მოსაზრებით, სასამართლო სისტემასთან დაკავშირებით არასამთავრობო სექტორს სამართლიანი მოთხოვნები აქვს.

„საქმე სასამართლო სისტემას და იქ არსებულ კლანურ მმართველობას ეხება. როგორც ჩანს, ყველა შეთანხმდა იმაზე, რომ ასე გაგრძელება შეუძლებელია და ეს მმართველობა უნდა დამთავრდეს. ბიძინა ივანიშვილს სურს, კლანური მმართველობა კიდევ უფრო იყოს ორიენტირებული მისი სურვილების შესრულებაზე. არასამთავრობო სექტორს სამართლიანი მოთხოვნები გააჩნია, რომელიც იმ წინადადებებს ეხმიანება, რაც „ევროპულმა საქართველომ“ დააყენა. იმედი გვაქვს, ერთობლივი ბრძოლით იმას მივაღწევთ, რომ კრიტერიუმები გამჭვირვალე და გაწერილი იქნება. ასევე ყველა კანდიდატურას ძალიან სერიოზული გასაუბრების გავლა მოუწევს. ეს მნიშვნელოვანია, რათა ნორმალური და დამოუკიდებელი სასამართლო სისტემა გვქონდეს. იუსტიციის უმაღლესი საბჭოს მხრიდან მკვეთრად პოლიტიზირებული განცხადებები და შეტევები ბევრჯერ ვნახეთ, მათ შორის საჯარო განცხადებები, რომელიც ვერანაირ კრიტიკას ვერ უძლებს და იმაზე მიუთითებს, როგორი ანგაჟირებულები არიან“, – განაცხადა კაპანაძემ.