საზოგადოება

სასწრაფოდ ვბრუნდები ამერიკიდან და დავამტკიცებ, რომ ჩემი ძმა უდანაშაულოა - ზურაბ იდოიძის და

პანკისის ხეობაში დღეს ჩატარებულ სპეცოპერციას, არასამართლიანს უწოდებს დაკავებულ, ზურაბ იდოიძის და, ნათია იდოიძე.

ის აცხადებს, რომ მისი ძმის უდანაშაულობას დაამტკიცებს.

"ჩემი ძმა უდანაშაულოა. მე ამის ყველანაირი მტკიცებულება მაქვს. ავსტრიაში იყო ბიძასთან, ბილეთები მე თვითონ ვუყიდე. ცოლთან და შვილებთან დაბრუნებას აპირებდა კანადაში. ის იყო 20 ივნისს თურქეთში, კანადის საელჩოს მოთხოვნის საფუძველზე იმყოფებოდა, სადაც მან პროცედურული შემოწმება გაიარა. ჩააბარა დნმ ანალიზი და ანაბეჭდები. სხვა მოტივით ის იქ არ ყოფილა, ეს არის სიცრუე. როგორც ვიცი ჩატაევთან კავშირში ადანაშაულებენ. როგორ ექნებოდა კავშირი ჩატაევთან, ეს არის სიცრუე.

მე სასწრაფოდ ვბრუნდები ამერიკიდან და დავამტკიცებ, რომ ჩემი ძმა უდანაშაულოა. მანამდე კი მოვუწოდებ, ცრუ ბრალდებებისგან თავი შეიკავონ,"- აცხადებს ნათია იდოიძე, რომლის კომენტარსაც ,,რუსთავი 2“ ავრცელებს.

ცნობისათვის - სახელმწიფო უსაფრთხოების სამსახურის კონტრტერორისტულმა დეპარტამენტმა, სასამართლოს განჩინების საფუძველზე, დღეს ახმეტაში საქართველოს მოქალაქე ზურაბ იდოიძე დააკავა. სოფელ ომალოში მის კუთვნილ სახლში ჩხრეკა ჩატარდა. როგორც სუს-ის მიერ გავრცელებუო ინფორმაციაშია ნათქვამი, გამოძიების ამ ეტაპზე დადგენილია, რომ დაკავებული ზურაბ იდოიძე, ზურაბ გორნაკაშვილთან ერთად ჩავიდა თურქეთის ქალაქ ხოფაში ახმედ ჩატაევის და მისი დაჯგუფების წევრების დასახმარებლად. დაკავებულმა, ზურაბ გორნაკაშვილთან ერთად ახმედ ჩატაევი და მისი დაჯგუფების წევრები ხოფაში, მათი დროებითი საცხოვრებელი ბინიდან მანქანით მიიყვანა თურქეთ-საქართველოს საზღვართან, კირნათი-მარადიდის მწვანე ზოლის მონაკვეთამდე.

„გამოძიება საქართველოს სსკ-ის 331-ე პრიმა მუხლის მესამე ნაწილით მიმდინარეობს,რაც ტერორიზმის დაფინანსებას , ტერორისტული საქმიანობის სხვაგვარ მატერიალურ მხარდაჭერას ან რესურსებით უზრუნველყოფას გულისხმობს,რამაც მძიმე შედეგი გამოიწვია. სასჯელის ზომად 17-დან 20 წლამდე ვადით ან უვადო თავისუფლების აღკვეთას ითვალისწინებს“, - ნათქვამია განცხადებაში.