პოლიტიკა

სავარაუდოდ, პრეზიდენტს ფრაქცია „ქართულ ოცნებაში“ შემავალი პარტიებისა და პოლიტიკური ჯგუფების ხელმძღვანელები შეხვდებიან - ეკა ბესელია

პარლამენტის იურიდიულ საკითხთა კომიტეტის თავმჯდომარე, ეკა ბესელია ვარაუდობს, რომ დღეს პრეზიდენტს ფრაქცია „ქართულ ოცნებაში“ შემავალი პარტიებისა და პოლიტიკური ჯგუფების ხელმძღვანელები შეხვდებიან. ამის შესახებ მან ჟურნალისტებს უთხრა.

„ალბათ, უმჯობესია, ჩვენი მხრიდან იყოს ფრაქციული წარმომადგენლობა. კერძოდ, უმრავლესობაში შემავალი პოლიტიკური ჯგუფებისა და პარტიების ხელმძღვანელები იყვნენ წარმოდგენილი. ვფიქრობ, რომ ეს შეხვედრა კარგი ამ ფორმატში იქნება. რაც შეეხება შეხვედრის შინაარსს, იცით, ჩვენგან რა საკითხებზეა მზაობა გაცხადებული. პრეზიდენტი რომელ საკითხზე ისაუბრებს და რას ფიქრობს, მისი შენიშვნებისთვის სამართლებრივი საკითხი რა უნდა იყოს, ამას მოვისმენთ“, - აღნიშნა ბესელიამ.

ახლად მიღებულ კონსტიტუციაზე სასაუბროდ პრეზიდენტი მმართველ გუნდს დღეს 16 საათზე პრეზიდენტის სასახლეში შეხვდება.

შეგახსენებთ, კონსტიტუციის მიღების შემდეგ პარლამენტის თავმჯდომარემ, ირაკლი კობახიძემ შესთავაზა პრეზიდენტ გიორგი მარგველაშვილს, ვეტო დაადოს ორ საკონსტიტუციო ცვლილებას. ერთ-ერთი მათგანი ეხება ბონუსის მექანიზმის გაუქმებას, ხოლო მეორე 2020 წლის საპარლამენტო არჩევნებისთვის ერთჯერადად ბლოკების შესაძლებლობის დატოვებას. მან აღნიშნა, რომ ამ საკითხზე სალაპარაკოდ მზადაა, ქვეყნის პირველ პირს შეხვდეს.

ახალი კონსტიტუცია საქართველოს პარლამენტმა 26 სექტემბერს მიიღო.

ანა მებურიშვილი