საზოგადოება
საზმაუს ბრიუსელის ბიურო არათუ იხურება, არამედ ძლიერდება ევროპაში - ვასილ მაღლაფერიძე
საზოგადოებრივი მაუწყებლის გენერალური დირექტორის, ვასილ მაღლაფერიძის განცხადებით, არხის ბრიუსელის ბიურო არ იხურება, არამედ ფართოვდება.
მისი განმარტებით, უცხოეთის ამბები არხის პრიორიტეტებში შედის და ჟურნალისტები როტაციის პრინციპით იმუშავებენ.
„უნდა გითხრათ, რომ ბრიუსელის ბიურო არათუ იხურება, არამედ ძლიერდება ევროპაში. უცხოეთი ჩვენი პრიორიტეტია და საკმაოდ გრძელი სკამი გვაქვს. გამოჩნდა ესპანეთის, სხვაგან და სხვაგან, მთელ რიგ მოვლენებთან მიმართებაში, რომ პროფილურადაც გვჭირდება სხვადასხვა ტიპის მუშაობა, რათა უფრო მოქნილები ვიყოთ. ამიტომ ჩვენ გვემატება საერთაშორისო გადაცემა. სწორედ ამიტომ გადაწყდა, რომ იქნება სწორედ როტაცია. ქალბატონ ქარდავასაც აქვს შეთავაზება და ის ჩვეულებრივად რჩება. მაქსიმალურად უნდა მოვიცვათ ჩვენი შესაძლებლობიდან გამომდინარე მთელი ევროპა. ჩვენ ვგეგმავთ, რომ გადაცემები მომზადდეს პირდაპირ იქიდან“, -თქვა მაღლაფერიძემ მაუწყებლის სამეურვეო საბჭოზე.
საზოგადოებრივი მაუწყებლის ევროპის ბიუროს ჟურნალისტმა, ქეთევან ქარდავამ ფეისბუკის საკუთარ გვერდზე დაწერა, რომ 2018 წლის 1-ელი თებერვლიდან არხის ხელმძღვანელობა ბიუროს ხურავს. ამის მიზეზად ფინანსები დასახელდა.
ანა მებურიშვილი