კომენტარი

საზოგადოებისთვის „ციანიდის საქმე“ შესაძლოა, ციანიდივით საშიში აღმოჩნდეს - დიმიტრი ხუნდაძე

საპარლამენტო უმრავლესობის წევრი, დიმიტრი ხუნდაძე ე.წ. ციანიდის საქმეს გამოეხმაურა.

მისი განცხადებით, ოპონენტების მხრიდან მიმდინარეობს არასახარბიელო პოლიტიკური თამაშები და ამ ყველაფრის მსხვერპლი საპატრიარქო გახდა.

„სურვილი მაქვს, რომ ნელ-ნელა კალაპოტში ჩადგეს ეს მნიშვნელოვანი საკითხი, დაძაბულობა პიკს აღწევს. რა თქმა უნდა, ჩემთვის არასასიამოვნოა, როდესაც შემზარავი ურთიერთბრალდებით გამოდის სხვადასხვა მხარე, ამ ბრალდებებში ერთვებიან სასულიერო პირები და საპატრიარქოს შიდა საქმე ასე ღიად გამოდის სააშკარაოზე. ვფიქრობ, რომ ქვეყანაში საკმაოდ არასახარბიელო პოლიტიკური თამაშები მიმდინარეობს ჩვენი ოპონენტების მხრიდან და ამ თამაშების მსხვერპლი ხდება საპატრიარქო. ვიღაცას სურს, რომ დიდი ბზარი შეიტანოს იმ ინსტიტუციაში, რომლის ყველაზე მაღალი ნდობა აქვს საზოგადოებას.

მნიშვნელოვანია ისიც, რომ ზოგიერთი ტელევიზია ხელს უწყობს, რომ შოუდ აქციოს ეს საკითხი. ვფიქრობ, ეს სახიფათო თამაში თუ დროულად არ დამშვიდდა, შესაძლოა „ციანიდის საქმე" ციანიდივით საშიში აღმოჩნდეს საზოგადოებისთვის. მქონდა შეთავაზებაც, რომ ამ საკითხთან დაკავშირებით მორატორიუმი გამოგვეცხადებინა - საპატრიარქო თვითონ გაერკვეს საკუთარ პრობლემებში და ასევე, საგამოძიებო ორგანოებსა და პროკურატურას მივცეთ საშუალება, რომ ობიექტურად მოხდეს საქმის ბოლომდე მიყვანა. რაც ნაკლები პოლიტიკური აურზაური იქნება ამ საკითხთან მიმართებაში და რაც მეტად გავუფრთხილდებით ერთ-ერთ ყველაზე მნიშვნელოვანს საზოგადოებისთვის - რწმენას, ყველასთვის უკეთესი იქნება", - განაცხადა დიმიტრი ხუნდაძემ დღევანდელ პრესკონფერენციაზე.

ნინო ექვთიმიშვილი