საზოგადოება

საზოგადოებრივ მაუწყებელში 10 წელში 410 მილიონია დახარჯული, ამას ასდის სუნი, რომ ეს იყო „კარმუშკა“ ვიღაცეებისთვის- ვასილ მაღლაფერიძე

საზოგადოებრივი მაუწყებლის დირექტორის, ვასილ მაღლაფერიძის განცხადებით, მაუწყებელში 2006-2016 წლებში ახალი დაფინანსების პრინციპზე გადასვლის შემდეგ, 410 მილიონი ლარი დაიხარჯა, თუმცა არხს არც რეგიონული ოფისები, არც სათანადო ტექნიკა და არც შესაფერისი შენობა გააჩნია.

როგორც მაღლაფერიძემ საზოგადოებრივი მაუწყებლის 2017-2019 წლების რეფორმის პრეზენტაციის დროს აღნიშნა, ამ ყველაფერს აზდის სუნი და ელფერი, რომ ყოველივე ეს ვიღაცისთვის „კარმუშკა“ იყო.

„საზოგადოებრივი მაუწყებლის ბიუჯეეტი განვითარებაზე არ არის ორიენტირებული. მაუწყებლის 10 წლის ხარჯი 2006-2016 წლამდე, მას შემდეგ რაც 2006 წელს ჩამოყალიბდა საზოგადოებრივი მაუწყებელი და დაიწყო დაფინანსების ის ახალი პრინციპი რაც დაიწყო, 410 მილიონი ლარია დახარჯული, აქედან, ტექნიკაზე მხოლოდ 5%-ია დახარჯული, ეს იმ პირობებში, როდესაც არ არის რეგიონული ოფისები, შენობა არის ცუდ მდგომარეობაში, ტექნიკა არის კატასტროფულ მდგომარეობაში და ასე შემდეგ, ამ დროს დახარჯულია 410 მილიონი ლარი. მე ვფიქრობ, რომ ეს თემა არის საინტერესო ჟურნალისტური გამოძიებებისთვის. აქ ბევრ საინტერესო რამეს იპოვით. მე არ მჩვევია დაუსაბუთებელი საუბარი. მხოლოდ ის შემიძლია ვთქვათ, რომ ძალიან ასდის ამას სუნი და ელფერი რომ ეს იყო „კარმუშკა“ ვიღაცეებისთვის. არაერთისთვის და არა ორისთვის“,-განაცხადა მაღლაფერიძემ.

მისი თქმით, არ არის გამორიცხული, რომ ბევრი ვინც დღეს ხმამაღლა ყვირის, არ უნდოდეს ამ თემების წინ წამოწევა, იმიტომ რომ თავის დროზე ამა თუ იმ ფორმით, შეიძლება ყოფილიყო ამ „კარმუშკასთან“.

„ვერც საქართველოში და ვერც მსოფლიოში ვერ ნახავთ ასეთ ორგანიზაციას, სადაც თითქმის ნახევარი მილიონია დახარჯული და ასეთი პირობები არსებობდეს“,-განაცხადა მაღლაფერიძემ.

მაღლაფერიძემ მაგალითისთვის 2016 წელიც მოიყვანა და აღნიშნა, რომ შარშან საზოგადოებრივ მაუწყებელში 40 მილიონი ლარი დაიხარჯა, აქედან 60% ხელფასებსა და მივლინებებზე, ტექნიკაზე 3%, სხვა ხარჯებმა 37% წაიღეს.

მონიკა დავლიანიძე