საზოგადოება

საზოგადოებრივი მაუწყებლის ახალი შენობა კოსტავას 68-ში აშენდება

საზოგადოებრივი მაუწყებლის გენერალური დირექტორის, ვასილ მაღლაფერიძის განცხადებით, გუშინ დაიწყო მუშაობა ტენდერზე არხის ახალი შენობის მშენებლობასთან დაკავშირებით.

მაღლაფერიძის თქმით, საზოგადოებრივი მაუწყებლის ახალი შენობა კოსტავა 68-ში იქნება.

„იგეგმება ტელევიზიის ახალი შენობის მშენებლობასთან დაკავშირებული ტენდერების კანონით გათვალისწინებული წინადადების მომზადება. ეს იყოფა ეტაპებად. ჯერ უნდა მომზადდეს საპროექტო დავალება, ამაზე იქნება ტენდერი. შემდეგ იქნება კონკურსი შენობასთან დაკავშირებით – ამაზე იქნება ტენდერი. შემდეგ იქნება მშენებლობაზე. ეს იქნება კოსტავას 68-ში იმ ადგილას, სადაც ჩვენ ვიმყოფებით, ტელევიზიის შენობის ოდნავ გვერდით“, - განაცხადა მაღლაფერიძემ.

მისი განცხადებით, მშენებლობა 2018 წელს დასრულდება.

შეგახსენებთ, რომ დღეს სამეურვეო საბჭომ კენჭისყრაზე არხის მენეჯმენტის მიერ წარდგენილი სამოქმედო გეგმა დაამტკიცა. ის ითვალისწინებს სტრუქტურულ ცვლილებებს, ასევე ტელევიზიაში რამდენიმე სამსახურის ერთ ბლოკად შერწყმასა და კონკურსის გამოცხადებას, რომლის მიზანი იქნება საეთერო ბადის განახლება.

ანა მებურიშვილი