საზოგადოება

საზოგადოებრივი მაუწყებლის კრიზისიდან გამოყვანისთვის საჭიროა თანამშრომლების რაოდენობის ოპტიმიზაცია - ვასილ მაღლაფერიძე

საზოგადოებრივი მაუწყებლის გენერალურმა დირექტორმა ვასილ მაღლაფერიძემ, არხის კრიზისიდან გამოყვანისთვის საჭირო ნაბიჯები ჩამოთვალა.

როგორც მაღლაფერიძემ 2017-2019 წლების სამოქმედო გეგმის წარდგენისას აღნიშნა, საჭიროა საინფორმაციო გამოშვების გარდა ყველა გადაცემის შეჩერება, კადრების ოპტიმიზაცია, გამოთავისუფლებული თანხების მიმართვა მატერიალურ-ტენქიკური ბაზის გასაახლებლად და ყველა სეგმენტში კონკურენციის პრინციპზე გადასვლა.

მისი განმარტებით, წარდგენილი ნაბიჯები არის მხოლოდ და მხოლოდ საექსპერტო შემოთავაზება და არხის ადმინისტრაცია საზოგადოების აზრს და მსჯელობის შედეგებს დაელოდება. მისი თქმით, მხოლოდ ამის შემდეგ დაიწყება გარკვეული ნაბიჯების გადადგმა.

„ეს არის საექსპერტო შემოთავაზება. იმიტომ რომ ჩვენ სხვა თანხა არ გვაქვს. ჩვენ გვაქვს 39 მილიონი და ამ 39 მილიონით უნდა შევძლოთ ყველა ამოცანის გადაჭრა: გადაიარღება, ოფისები, არქივი და ასე შემდეგ და ამავე დროს განვითარება. სხვა თანხა არ გვაქვს. ამიტომ ამ ეტაპზე მიგვაჩნია ტექნიკური საშუალებებიდან გამოდმინარე, საჭიროა: მაუწყებლის ყველა პლატფორმაზე ყველა გადაცემის და წარმოების შეჩერება (საინფორმაციო გამოშვების გარდა); თანამშრომლების რაოდენობის ოპტიმიზაცია; გამოთავისუფლებული თანხების მიმართვა მატერიალურ-ტექნიკური და ტექნოლოგიური ბაზის გასაახლებლად; მაუწყებლის ყველა სეგმენტში კონკურენციაზე გადასვლა“,-განაცხადა მაღლაფერიძემ.

მისი თქმით, 2017 წელს ოპტიმიზაციის შედეგად გამოთავისუფლდება დაალოებით 15 მილიონი ლარი.

„სულ 2017-2019 წლებში ახალ შენობაზე, რეგიონულ ოფისებზე, ტექნიკურ და ტექნოლოგიურ გადაიარაღებაზე, არქივის გაციფვრაზე დაიხარჯება დაახლოებით 45 მილიონი ლარი. ეს არის ის აუცილებელი ხარჯი, რომელიც უნდა დაიხარჯოს ამ ბაზის შესაქმნელად“,-განმარტა საზოგადოებრივი მაუწყებლის გენერალურმა დირექტორმა.

მონიკა დავლიანიძე