საზოგადოება
საზოგადოებრივი მაუწყებლის მენეჯმენტის გადაწყვეტილება ცუდად აისახება დემოკრატიულ პროცესებზე - ჰარლი ლევლი
საზოგადოებრივი მაუწყებლის პირველადი და დამოუკიდებელი პროფკავშირები ამერიკის პროფესიული კავშირის დელეგაციის წევრებს შეხვდნენ, სადაც ისაუბრეს მაუწყებლის მენეჯმენტის მიერ დაგეგმილ რეფორმებსა და მათ სავარაუდო შედეგებზე.
ამერიკის პროფკავშირების დელეგაციის წარმომადგენლის, ჰარლი ლევლის განცხადებით, საზოგადოებრივ მაუწყებელში დაგეგმილი რეფორმები შეიძლება ნეგატიურად იმოქმედოს დემოკრატიულ პროცესებზე.
„მნიშვნელოვანი შეხვედრა იყო ჩვენს კოლეგებთან. ის ინფორმაცია, რომელიც მაუწყებლის პროფკავშირმა მოგვაწოდა, ნამდვილად არასახარბიელოა. იმ შემთხვვაში, თუ მენეჯმენტი ამ გადაწყვეტილებას მიიღებს, ეს ცუდად აისახება დემოკრატიულ პროცესებზე“, - განაცხადა ლევლიმ.
დელეგაციის მეორე წევრი, ვიტალი კიუსმი ფიქრობს, რომ არხზე განსახორციელებელი ცვლილებები ტელევიზიაში დასაქმებულების სამუშაო პირობებს გააუარესებს.
„ინფორმაცია, რომელიც დღეს მივიღეთ, აჩენს ეჭვს, რომ აქ დასაქმებულ პირებს რთულ პირობებში მოუწევთ ყოფნა. აუცილებელია, მაუწყებელში პროცესები გამჭვირვალედ წარიმართოს. ჩვენ მხარს ვუჭერთ მათ [თანამშრომლებს] და დავაკვირდბით პროცესს“, - თქვა კიუსმიმ.
შეგახსენებთ, რომ არხის ახალი გენერალური დირექტორი ვასილ მაღლაფერიძე და მისი გუნდი აპირებს, არხის რეფორმის პროცესში, დახუროს ყველა ის გადაცემა, რომლის რეიტინგი არხის საშუალო მაჩვენებელზე დაბალია. მათ შორისაა ისეთი გადაცემები, როგორც „წითელი ზონაა“ და „რეალური სივრცე“.
ანა მებურიშვილი