საზოგადოება

საზოგადოებრვიი მაუწყებლის სამეურვეო საბჭო სამუშაო შეხვედრებს ყოველდღიურ რეჟიმში იწყებს

საზოგადოებრივი მაუწყებლის სამეურვეო საბჭო სამუშაო შეხვედრებს ყოველდღიურ რეჟიმში იწყებს.

ბორდმა ხუთშაბათამდე უნდა მიიღოს გადაწყვეტილება თუ რა იქნება მაუწყებლის ეფექტურობის კრიტერიუმი.

როგორც საკითხის კომენტირებისას სამეურვეო საბჭოს წევრმა მარინა მუსხელიშვილმა აღნიშნა, ბორდმა უნდა შეიმუშაოს ის დოკუმენტი, რომლითაც გენერალური დირექტორი იხელძღვანელებს არხის რეფორმირების პროცესში.

„ჩვენ უნდა შევიმუშავოთ ის დოკუმენტი, რომლითაც იხელძღვანელებს დირექტორი სამწლიან პერსპექტივაში თავის რეფორმებში. რასაკვირველია ამის ელემენტები არსებობს კანონში, ჩვენს მიერ მიღებულ სტრატეგიაში და პროგრამულ პრიორიტეტებში. მაგრამ, ვეთანხმებით დირექტორის იმ თხოვნას, რომ მოხდეს დახვეწა, ჩამოყალიბდეს შედარებით უფრო მოკლედ და გამჭვირვალედ და რომ მისთვის ადვილი იყოს ამით ხელმძღვანელობა“,-აღნიშნა მუსხელიშვილმა.

ბორდის კიდევ ერთ წევრს ირაკლი პაპავას ეჭვი აქვს, რომ არხის სამეურვეო საბჭო ვასილ მაღლაფერიძის მიერ შეთავაზებულ განვითარების გეგმას მხარს არ დაუჭერს.

„მე პირადად პირდაპირ შემიძლია ვთქვა, რომ მომხრე არ ვარ იმ მკაცრი ვარიანტის, რომელიც იყო შემოთავაზებული. ეჭვი მაქვს, რომ ეს გეგმა იმ სახით როგორიც არის შემოთავაზებული არ იქნება ბორდის მიერ მხარდაჭერილი. უნდა იქნას შეტანილი ძალიან სერიოზული კორექტივები. ვნახოთ, ეს მუშა პროცესია და მგონია წამოგვყვება ამაზე დირექტორი“,-აღნიშნა პაპავამ.

მონიკა დავლიანიძე