ეკონომიკა

სემეკ-ის თავმჯდომარემ ბუნებრივ აირსა და ელექტროენერგიაზე სამომხმარებლო ტარიფების ზრდა არ გამორიცხა

ენერგეტიკისა და წყალმომარაგების მარეგულირებელი ეროვნული კომისიის თავმჯდომარის, ირინა მილორავას თქმით, ლარის გაუფასურების ფონზე სემეკს გაზმომარაგებაზე მომუშავე კომპანიებმა მიმართეს ტარიფების გადახედვის მოთხოვნით.

მილორავას თქმით, წლის ბოლომდე გაირკვევა, გაიზრდება თუ არა ბუნებრივ აირზე სამომხმარებლო ტარიფი.

„სატარიფო განხილვა ეხება რამდენიმე კომპანიას. ეხება გაზის ტრანსპორტირების კომპანიას. კომპანია „ყაზტრანსგაზს“, „საქორგაზს“ და“სოკარჯორჯიაგაზს“. შესაბამისად, როგორ იქნება საბოლოოდ სამომხმარებლო ტარიფი დამოკიდებულია ამ კომპანიების ტარიფების დადგენაზე. პასუხი გვეცოდინება ამ წლის ბოლომდე“, - თქვა მილორავამ.

რაც შეეხება ელექტროენერგიის გადასახადს, მილორავამ ახსნა, რომ თუ კომპანიები ჩათვლიან, რომ მათი ხარჯები და შემოსავლები შეიცვალა, მათ აქვთ უფლება, შეიტანონ განაცხადი სატარიფო გადასახადის ცვლილებასთან დაკავშირებით.

„ჩვენ ელექტროენერგეტიკული სექტორისთვის ტარიფები დავადგინეთ შარშან და მან მოიცვა პერიოდი 2019-2020-ის ჩათვლით. თუ გახსოვთ, კომპანიებს აქვთ უფლება, თუ ისინი შეაფასებენ, რომ გარკვეული ცვლილებები იმ მოცემულობაში, რომელიც საფუძვლად დავუდეთ ტარიფის დათვლას, შევიდა, არსებითი ცვლილებები, შეიცვალა მათი ხარჯები და შემოსავლები, ბუნებრივია, მათ აქვთ უფლება, მოგვმართონ სატარიფო განაცხადით“, -განმარტა მილორავამ.