საზოგადოება

სემეკში წყალმომარაგების კომპანიების განაცხადების განხილვა აქციის ფონზე მიმდინარეობს

საქართველოს ენერგეტიკისა და წყალმომარაგების კომისიაში წყალმომარაგების კომპანიების განაცხადების მიღება აქციის ფონზე მიმდინარეობს.

სემეკ-თან "ლეიბორისტული პარტიის" ერთ-ერთი ლიდერი, გიორგი გუგავა მხარდამჭერებთან ერთად მივიდა.

გუგავას სხდომაზე შესვლა აქციის მონაწილეებთან ერთად სურდა, რისი უფლებაც მას შენობასთან მობილიზებულმა პოლიციელებმა არ მისცეს. სამართალდამცველებმა კორდონი გააკეთეს და მოქალაქეები შენობაში არ შეუშვეს.

მათ "ლეიბორისტული" პარტიის პოლიტიკურ მდივანს განუმარტეს, რომ სხდომათა დარბაზში ხალხმრავლობაა და მოქალაქეთა შესვლა შეუძლებელია, რასაც სამართალდამცველებსა და გიორგი გუგავას შორის მცირე შელაპარაკება მოჰყვა.

თავად გიორგი გუგავა ამ წუთებში სემეკ-ის სხდომაზე იმყოფება. ის მოითხოვს არ მოხდეს წყლის გადასახადის გაზრდა.

ცნობისათვის, Georgian Water and Power-მა, რუსთავისა და მცხეთის წყლის კომპანიებმა, საქართველოს ენერგეტიკისა და წყალმომარაგების კომისიას ტარიფის გაზრდის გეგმიური განცხადებით მიმართეს.

ნინო ექვთიმიშვილი