საზოგადოება

სერგეენკომ უნდა ჩართოს კერძო სადაზღვევო კომპანიები საყოველთაო ჯანდაცვის პროგრამაში - ზურაბ ჭიაბერაშვილი

პარლამენტის ფრაქცია „თავისუფლებისთვის-ევროპული საქართველოს“ წევრი ზურაბ ჭიაბერაშვილი გამოეხმაურა მთავრობის დადგენილებას კერძო და საყოველთაო პროგრამის სადაზღვეო პაკეტების ერთმანეთისგან გამიჯვნის შესახებ. ჭიაბერაშვილის განცხადებით, საყოველთაო დაზღვევის პროგრამაში კერძო კომპანიებიც უნდა იყვნენ ჩართულნი.

„როცა დავით სერგეენკო კონფლიქტშია შესული საავადმყოფოებთან და სადაზღვევო კომპანიებთან, რის გამოც ზარალდებიან პაციენტები, ისინი მკურნალობის ხარჯის მინიმუმ 60%-ს თავისი ჯიბიდან იხდიან, მიუხედავად ამისა, რომ სახელმწიფო ამდენ ფულს ხარჯავს. ასეთ პირობებში საუკეთესო გამოსავალია, რომ საყოველთაო ჯანდაცვის პროგრამაში ჩართული ადამიანების ნაწილი გადაეცეს, რა თქმა უნდა, სახელმწიფო კონტროლით კერძო სადაზღვეო კომპანიებს“, - განაცხადა ჭიაბერაშვილმა ჟურნალისტებთან საუბრისას.

„ევროპული საქართველოს“ წევრის თქმით, მათი ინიციატივის თანახმად, მოხდება ფინანსური და ჯანმრთელობის რისკების შემცირება.

„ეს გამოიწვევდა ფინანსური და ჯანრთელობის რისკების იმ გაზავებას, რომ არ დაზარალდებოდა არც პაციენტი, არ დაზარალდებოდა არც საავადმყოფო და არ დაზარალდებოდნენ არც სადაზღვეო კომპანიები. ამიტომ, მოვუწოდებ დავით სერგეენკოს, რომ გადადგას ეს მნიშვნელოვანი ნაბიჯი და კონფლიქტის მაგივრად, რომელშიც ის შესულია მესამე წელია, სადაზღვეო სექტორთან, პირიქით, გამოიყენოს სადაზღვეო სექტორის პოტენციალი“, - განაცხადა ზურაბ ჭიაბერაშვილმა.

შეგახსენებთ, რომ გუშინ „საქართველოს სადაზღვეო ასოციაციამ“ და სადაზღვეო კომპანიებმა ერთობლივი პრესკონფერენცია გამართეს, სადაც მიმართეს მთავრობას, რომ მან გადახედოს მის მიერ მიღებული 73-ე დადგენილება, რომლის თანახმად, ერთმანეთს გაემიჯნება კერძო და საყოველთაო ჯანდაცვის პროგრამით გათვალისწინებული სადაზღვეო პაკეტები.

„საქართველოს სადაზღვეო ასოციაციის“ გამგეობის თავჯდომარის, დევი ხეჩინაშვილის თქმით, ასეთი მიდგომა სოციალურ პრობლემას გამოიწვევს, რადგან საყოველთაო ჯანდაცვის პროგრამით მოსარგებლეებს მოუწევთ „ჯიბიდან გადაიხადონ“ იმ სერვისებში, რომლებიც საყოველთაო დაზღვევა არ აფინანსებს. მან ასევე თქვა, რომ ცვლილებას ჯანდაცვის სერვისის გაუმჯობესება არ მოჰყვება.

მათ მიმართვას შემდგომ გამოეხმაურა ჯანდაცვის მინისტრი დავით სერგეენკო. მან განაცხადა, რომ „მთავრობის მიერ მიღებული დადგენილება ამ საკითხთან დაკავშირებით არ შეიცვლება და სადაზღვევო კომპანიებს შეუძლიათ, ეს საკითხი დაივიწყონ“.

მთავრობის 73-ე დადგენილების თანახმად, კერძო სადაზღვევო პაკეტების კლიენტები ავტომატურად ეთიშებიან საყოველთაო ჯანდაცვის პროგრამას. კერძო და საყოველთაო დაზღვევის პროგრამის მომხმარებელთა სია განისაზღვრება 2017 წლის 1 იანვრის მდგომარეობით. თვითონ კანონი 2017 წლის 1 მარტს ამოქმედდება.

ანა მებურიშვილი