ეკონომიკა
სესხების გალარების მოთხოვნით 2000-ზე მეტი განცხადებაა შეტანილი - ზურაბ გვასალია
საქართველოს ბანკების ასოციაციის პრეზიდენტის ზურაბ გვასალიას განცხადებით, უკვე 100-ზე მეტმა ადამიანმა დოლარში აღებული სესხები გაალარა. აღნიშნული პოლიტიკის ამოქმედებიდან მე-3 დღეს 2000-ზე მეტი განცხადებაა შეტანილი.
საშუალო პროცენტი, რომელიც გალარებისას დაფიქსირდა, 10-11 %-ს შეადგენს.
„ვფიქრობთ, გალარების პროგრამით პოტენციური მონაწილეების მაქსიმალური რაოდენობა ისარგებლებს. მხოლოდ სამი დღეა გასული, ბანკებში კი არ წყდება სატელეფონო ზარები, ხოლო მიმართვიანობამ 2000-ს გადააჭარბა.
აღსანიშნავია ისიც, რომ ბანკებს ჯერ არ დაუსრულებიათ გალარების პროგრამის პოტენციური მონაწილეების მოკლე ტექსტური შეტყობინებებით ინფორმირება. მოსახლეობა ძალიან აქტიურია, რაც კიდევ ერთხელ მიანიშნებს იმას, რომ მათთვის საინტერესო და მისაღებია საბანკო სესხების იმ ვალუტაში გადმოტანა, რომელშიც შემოსავალი აქვს“, – განაცხადა ბანკების ასოციაციის პრეზიდენტმა.
ზურაბ გვასალიას თქმით, საქართველოს საბანკო სექტორი მზადაა, გალარების პროგრამის ხარვეზების გარეშე მოემსახუროს.
სესხების გალარიზაციის პროგრამა 17 იანვარს იწყება და 2 თვის განმავლობაში გაგრძელდება. პროგრამაში მონაწილეობის უფლება აქვთ იმ პირებს, ვისაც 2015 წლის 1-ელ იანვრამდე აღებული აქვთ სესხი და იმავე წლის მდგომარეობით, მისი შემოსავალი 100 000-ს ლარს არ აღემატება. მაქსიმალური თანხა, რომელსაც გალარება შეეხება, 40,000 აშშ დოლარია.
კომერციული ბანკები 5 სამუშაო დღის განმავლობაში სმს-ით ან სხვა საშუალებებით უნდა დაუკავშირდნენ ამ საკითხში პოტენციურად დაინტერესებულ პირებს.
ანა მებურიშვილი