კომენტარი

შარშან ივანიშვილის მთავრობამ გააკეთა საჩუქრის სახით საზოგადოებისთვის დენის ტარიფის გაზრდა, იგივე მეორდება ახალი წლების წინაც - ზურაბ ჭიაბერაშვილი

ბუნებრივი აირის ტარიფის შესაძლო გაზრდას „ევროპული საქართველოს“ წევრი, ზურაბ ჭიაბერაშვილი ეხმაურება.

მისი თქმით, გაზზე საფასურის მატება მოსახლეობას მძიმე ტვირთად დააწვება.

„გაზის ტარიფი ძალიან ბევრ რეგიონში ორი წლის წინ უკვე გაიზარდა და მძიმე ტვირთი ისედაც უკვე იყო ჩვენი გაღარიბებული მოსახლეობისთვის. შარშან ივანიშვილის მთავრობამ გააკეთა საჩუქრის სახით საზოგადოებისთვის დენის ტარიფის გაზრდა. სამწუხაროდ, იგივე მეორდება ახალი წლების წინ, როცა მაღალი ალბათობით, მოსალოდნელია გაზის ტარიფის გაზრდა და ეს კიდევ უფრო დაამძიმებს ჩვენი გაღარიბებული მოქალაქეების მდგომარეობას.

ისე არის ბევრი უყაირათო ხარჯით სავსე ბიუჯეტი, რომ რაიმე რესურსი, რომ ახლა ბიუჯეტი შეაშველონ სუბსიდირების სახით გაზის ტარიფს, პრაქტიკულად წარმოუდგენელია. შესაბამისად, ისევ ეს ყველაფერი გადაივლის ჩვენი მოქალაქეების ჯიბეზე,“- განაცხადა ზურაბ ჭიაბერაშვილმა.

ცნობისთვის, ენერგეტიკის მარეგულირებელ კომისიაში ამ წუთებში სხდომა მიმდინარეობს, სადაც ბუნებრივი აირის ტარიფი უნდა დადგინდეს.