საზოგადოება

შეიძლება, პასუხისმგებელმა სტრუქტურამ 2 დღეში ურთიერთგამომრიცხავი ორი განცხადება გააკეთოს და შედეგი არ იწვნიოს? - ანა დოლიძე ხადას ხეობაში მომხდარ მკვლელობაზე

იუსტიციის უმაღლესი საბჭოს არამოსამართლე წევრი ანა დოლიძე გამოეხმაურა შსს-ის განცხადებებს ხადას ხეობაში სმიტების 3-სულიანი ოჯახის მკვლელობის შესახებ. მისი შეფასებით, აუხსნელი არ უნდა დარჩეს, უწყებამ რატომ გაავრცელა ურთიერთგამომრიცხავი განცხადებები მომხდართან დაკავშირებით.

„ხადას ხეობის ამბავი ხომ საშინელი ტრაგედიაა. როგორ უნდა გადავიტანოთ ეს ყველამ, საკითხავია. მაგრამ უპასუხისმგებლობისა და დაუსჯელობის გამეფებულ სინდრომზე რომ ვსაუბრობ ხოლმე, შსს-ს ამ შემთხვევას ვგულისხმობ: ორი დღეა სამინისტრო გვეუბნებოდა, რომ ძალადობის ნიშნები არ აღინიშნებაო, ახლა გვეუბნებიან საზარელი, თრილერის მსგავსი მკვლელობის შესახებ. შეიძლება, პასუხისმგებელმა სტრუქტურამ 2 დღეში ურთიერთგამომრიცხავი ორი განცხადება გააკეთოს და შედეგი არ იწვნიოს? შეიძლება, რომ სრულიად გადაუმოწმებელი, არაკვალიფიციური, მოუმზადებელი რამ უთხრა ხალხს, მერე გადათქვა და მერე არაფერი? სულ მცირე, უპუხისმგებლობაა და უარეს შემთხვევაში მანიპულაცია. ამ სიმაღლის სახელმწიფო უწყებას ბევრად მეტი დაფიქრება და სიფრთხილე მართებს. თუ არ იცი მიზეზი, თქვი, რომ იძიებ, დაადგენ და იტყვი, რომ გაარკვევ. უნდა გამოვიდეს ახლა სამინისტრო, ახსნას, რატომ მოხდა ეს. სხვა შემთხვევაში გამოდის, რომ მის წინასწარ დასკვნებს ჩირის ფასი აქვს“, - დაწერა დოლიძემ ფეისბუკის საკუთარ გვერდზე.

შსს-ის ინფორმაციით, ხადას ხეობაში მომხდარი საზარელი მკვლელობის ფაქტზე 1998 წელს დაბადებული მ.კ დააკავეს, რომელიც ბრალს აღიარებს. მას უვადო პატიმრობა ემუქრება.

უწყებამ თავდაპირველად გაავრცელა ინფორმაცია, რომ დაღუპულებს ძალადობის კვალი არ აღენიშნებოდათ.

2018 წლის 6 ივლისს 112-ში შევიდა შეტყობინება საქართველოსა და ამერიკის ორმაგი მოქალაქეობის მქონე 2 პირისა და მათი 4 წლის შვილის დაკარგვის შესახებ. ბავშვის მშობლები, საქართველოსა და აშშ-ის ორმაგი მოქალაქე ცოლ-ქმარი დაღუპული იპოვეს, ბავშვს კი ამ დღეების განმავლობაში ეძებდნენ. მისი ცხედარი დღეს იპოვეს.

აშშ-ის მოქალაქეებს ორმაგი მოქალაქის სტატუსი ჰქონდათ მინიჭებული და რამდენიმე წელია, რაც საქართველოში, მარნეულში ცხოვრობდნენ.