საზოგადოება

„შენების მოძრაობა“ განათლების სფეროში „ქართული ოცნების“ პოლიტიკას აგრესიულად და დაშინების პოლიტიკად აფასებს

„შენების მოძრაობა“ განათლების სფეროში „ქართული ოცნების“ პოლიტიკას აგრესიულად და დაშინების პოლიტიკად აფასებს.

დღეს გამართულ პრესკონფერენციაზე მოძრაობის ერთ-ერთი წევრი, ალუდა გოგლიჩიძე განათლების მინისტრის, ალექსანდრე ჯეჯელავას განცხადებას გამოეხმაურა.

როგორც იცით, 2017 წლის 11 აგვისტოს ჟურნალისტებთან შეხვედრისას ბატონმა ჯეჯელავამ განაცხადა, რომ საპირფარეშოების თემა, ნომერი პირველი პრიორიტეტია სკოლებში და ამის გამო, იგი, მზად არის თანამდებობიდან გაათავისუფლოს ნებისმიერი სკოლის ნებისმიერი დირექტორი.

გოგლიჩიძე მიიჩნევს, რომ „ქართული ოცნების“ განათლებისა და მეცნიერების მინისტრის და იმავდროულად, ვიცე-პრემიერის მიერ სკოლებში სველი წერტილების მოწესრიგებასთან დაკავშირებით დირექტორების გათავისუფლების შესახებ გაკეთებული განცხადება, მოახლოებული თვითმმართველობის არჩვენების წინ, სკოლებში შიშის დანერგვისა და დირექტორებზე მავნე ზეგავლენის მოხდების მცდელობაა.

„არცერთი სკოლის დირექტორს თვალით არ უნახავს განათლების მინისტრის მიერ შემუშავებული სანიტარული ნორმების დაცვის სტანდარტის დოკუმენტი, რომლის მიხედვითაც ბატონი ჯეჯელავა ითხოვს სველი წერტილების მოწერიგებას.

სკოლებში არ არსებობს მონიტორინგის ერთიანი, გამჭვირვალე სისტემა, რომელიც რაიმე სტანდარტს შეამოწმებს. ამ პირობებში, მინისტრი არც სამეურვეო საბჭოებს, როგორც საზოგადოებრივი ჩართულობის მექანიზმს არ იყენებს, სადაც კანონმდებლობის მიხედვით ერთი წარმომადგენელი სამინისტროსაც ჰყავს. შესაბამისად, ჩნდება კითხვა, ასეთი მიდგომა, მართვის ავტორიტარული სტილის დამკვიდრების სურვილს ხომ არ ჰგავს?“ - განაცხადა ალუდა გოგლიჩიძემ.

მისი განმარტებით, საკითხის მასშტაბურობიდან გამომდინარე „შენების მოძრაობა“ თავისუფალი და სამართლიანი არჩევნებისათვის უწყებათაშორის კომისიას და მის თავმჯდომარე, თეა წულუკიანს მოუწოდებს, მიიღოს შესაბამისი რეკომენდაციები.

„ჩვენი მხრიდან კი ვაცხადებთ, რომ „შენების მოძრაობა“ უსამართლოდ და პოლიტიკური ნიშნით დირექტორების გათავისუფლების პრევენციის, განათლების სისტემაში მომუშავე ნებისმიერი დასაქმებულის უფლებების დაცვის მიზნით (პედაგოგი, დირექტორი თუ სხვა) იწყებს იურიდიულ კონსულტაციებს, რათა ვერავინ შეძლოს პედაგოგებისა თუ დირექტორების პოლიტიკური ნიშნით დევნა“ - აცხადებს ალუდა გოგლიჩიძე.