პოლიტიკა

შესაძლოა, აფგან მუხთარლის საქმეზე საპარლამენტო კომისია შეიქმნას - გრიგოლ ლილუაშვილი

პარლამენტის თვითმმართველობის კომიტეტის თავმჯდომარის, გრიგოლ ლილუაშვილის თქმით, შესაძლოა, აზერბაიჯანელი ჟურნალისტის, აფგან მუხთარლის საქმეზე საპარლამენტო კომისია შეიქმნას.

ლილუაშვილის განცხადებით, მმართველ გუნდში გამოძიების შედეგებს ელოდებიან, რის შემდეგ გადაწყდება, შეიქმნება თუ არა კომისია.

„საბოლოო ჯამში, თუკი საზოგადოებრივი ინტერესი დაკმაყოფილებული არ იქნება, ამას ვერ ავცდებით. კომისიის შექმნის წინააღმდეგი გუნდში არავინ არ არის, უბრალოდ, საუბარი იყო, გამოძიებისთვის საშუალება მიგვეცა, რათა ეს საქმე მაქსიმალურად გამოეძიებინათ და საზოგადოებისთვის ინფორმაცია მიეწოდებინათ. არ გამოვრიცხავ, რომ ამას მხარი დავუჭიროთ. გასაგებია, რომ ქართული სპეცსამსახურები ამაში არ მონაწილეობდნენ, თუმცა, გამოსაძიებელია, ვინ მონაწილეობდა და ჩვენი სპეცსამსახურების გვერდის ავლით, ჩვენს ტერიტორიაზე ვინ მოქმედებდა. ეს ჩვენთვის ძალიან მნიშვნელოვანია“, - განაცხადა ლილუაშვილმა.