საზოგადოება

შეწყალებული 123 მსჯავრდებულიდან, რომლებიც დღესვე დატოვებენ საპატიმროებს, ნახევარზე მეტი ნარკოდანაშაულისთვის იჯდა - ზვიად ქორიძე

შეწყალების კომისიის თავმჯდომარის, ზვიად ქორიძის ინფორმაციით, შეწყალებული 123 მსჯავრდებულიდან, რომლებიც საპატიმროებს დღესვე დატოვებენ, 65 სხვადასხვა ტიპის ნარკოდანაშაულისთვის იხდიდა სასჯელს.

ქორიძემ ეს ახსნა პრეზიდენტის მაქსიმალურად ლოიალური მიდგომით ნარკოდანაშაულის მიმართ.

„მიდგომა პრეზიდენტის ნარკოდანაშაულებთან მიმართებაში მაქსიმალურად ლოიალურია. 123 მსჯავრდებულიდან, რომლებიც დღეს დატოვებენ სასჯელაღსრულების დაწესებულებას, ნახევარზე მეტი, 65 მსჯავრდებული სხვადასხვა ტიპის ნარკოდანაშაულისთვის იხდიდა სასჯელს. მათ შორის, ვისაც შეუმცირდათ სასჯელი, არიან ნარკოდანაშაულისთვის ბრალდებულები. ნარკოდანაშაულზე დაკავებულები იყვნენ ის პირები, ვისაც უვადო სასჯელი ვადიანით შეეცვალათ. პრეზიდენტიცა და კომისიაც ფიქრობს, რომ ასეთი ტიპია გადაწყვეტილებით გამოხატა თავისი ლოიალური დამოკიდებულება ნარკოდანაშაულების მიმართ. საქართველოს პრეზიდენტი მოუწოდებს გადაწყვეტილების მიმღებ პოლიტიკოსებს, ნარკოპოლიტიკა გახდეს ლიბერალური“, – აღნიშნა ზვიად ქორიძემ.

საქართველოს პრეზიდენტმა გიორგი მარგველაშვილმა წინასაახალწლოდ 187 მსჯავრდებული შეიწყალა, აქედან 12 ქალი და 3 არასრულწლოვანი.

შეწყალების კომისიის თავმჯდომარის, ზვიად ქორიძის ინფორმაციით, საჯელაღსრულების დაწესებულებებს 123 მსჯავრდებული დღესვე დატოვებს. აქედან 8 ქალია, ხოლო 1 არასრულწლოვანია.

სულ კომისიამ 1182 მსჯავრდებულის საქმე შეისწავლა 14-24 დეკემბრის პერიოდში.

ანა მებურიშვილი