საზოგადოება

შპს ელფი თბილისის ბაგა-ბაღებს უხარისხო ყველსა და კარაქს აწვდიდა - თბილისის მერია

თბილისის მერიის განცხადებით, კომპანია შპს ელფი თბილისის ბაგა-ბაღებს იმაზე ნაკლებად ხარისიხიან ყველსა და კარაქს აწვდიდა, ვიდრე ხელშეკრულებით იყო გათვალისწინებული.

ხელშეკრულებით ნაკისრი ვალდებულებების უხარისხოდ და არაჯეროვნად შესრულების გამო, თბილისის საბავშვო ბაგა-ბაღებს მიეცათ მითითება, მიმართონ შესაბამის ბანკს და საბანკო გარანტიით გათვალისწინებული თანხა გამოითხოვონ, რაც ჯამში 409 ათასი ლარია.

"კომპანიას არ დაუბრუნდება საბანკო გარანტიით გათვალისწინებული თანხა, რაც ჯამური თანხის 3%-ს შეადგენს და ის მთლიანად ჩაირიცხება საბავშვო ბაგა-ბაღების საბანკო ანგარიშზე," - აცხადებენ მერიაში.

მათივე ინფორმაციით, შპს ელფი მომსახურებას თბილისის 171 ბაგა-ბაღს 2017 წლის 18 სექტემბრიდან 22 დეკემბრის ჩათვლით უწევდა.