მსოფლიო

შსს-ის თანამშრომელთა ხელფასის ზრდის პროცესი 2019 წლისთვისაც გაგრძელდება - გიორგი გახარია

შს მინისტრის, გიორგი გახარიას ინფორმაციით, შსს-ის თანამშრომლებს ხელფასები 2019 წელსაც გაეზრდებათ. ამის შესახებ გახარიამ სიტყვით გამოსვლისას განაცხადა, სადაც მან სამინისტროს მუშაობის ანგარიში წარუდგინა და პრიორიტეტებზე ისაუბრა.

„ჩვენთვის კრიტიკულად მნიშვნელოვანია პოლიციელებისა და შსს-ის თანამშრომლების სოციალური უზრუნველყოფა. მოგეხსენებათ, რომ ჩვენ გარკვეულწილად მოვახერხეთ მათი სახელფასო ანაზღაურების ზრდა 2018 წელს, ასევე მინდა გითხრათ, რომ ეს პროცესი გაგრძელდება 2019 წლისთვისაც“, - განაცხადა შს მინისტრმა.

გახარიას თქმით, თანამშრომლების სოციალურ უზრუნველყოფაში ხელფასების ზრდის გარდა კიდევ მოიაზრება რამდენიმე კომპონენტი, მათ შორის, ბინათმშენებლობის საკითხი.

„ხელფასების ზრდა არ არის მხოლოდ და მხოლოდ ის სოციალური პორტფელი, რომელსაც ეს ადამიანები იმსახურებენ. ვფიქრობ, რომ აქ იქნება სოციალური კომპონენტის კიდევ უფრო მნიშვნელოვანი მაგალითები.

ბინათმშენებლობით დაწყებული, სამედიცინო მომსახურებით დამთავრებული, განათლებით გაგრძელებული და ა.შ. ამ მიმართულებით რესურსულად შსს იქნება სრულად მობილიზებული, რამეთუ ამ ადამიანებს აბსოლუტურად სწორი და პროგნოზირებადი წარმოდგენა ჰქონდეთ თავიანთ მომავალზე გრძელვადიანი პერსპექტივაში, განსაკუთრებით იმ ახალგაზრდებს, რომლებიც სისტემაში იწყებენ მუშაობას“, – განაცხადა გახარიამ.