სამართალი

შსს-მ ბათუმში მომხდარ ფაქტთან დაკავშირებით 6 პირი დააკავა

შინაგან საქმეთა სამინისტრომ ბათუმში 11-12 მარტის მოვლენებთან დაკავშირებით 6 პირი დააკავა.

,,ბათუმში მომხდარ ფაქტთან დაკავშირებით დაკავებულია 6 პირი საქართველოს სსკ-ს 225-ე და 353-ე პრიმა მუხლებით (მასობრივი არეულობა და პოლიციელზე ან საჯარო დაწესებულებაზე თავდასხმა)’’, - აცხადებენ უწყების პრესსამსახურში.

მათივე ცნობით, სხვა პირთა იდენტიფიცირებისა და მტკიცებულებების მოპოვების მიზნით გრძელდება საგამოძიებო მოქმედებები.

ცნობისათვის, ბათუმში განვითარებულ მოვლენებთან დაკავშირებით რამდენიმე ათეული პირის ადმინისტრაციული წესით დაკავება მოხდა. მათი უმეტესობა მოგვიანებით, ჯარიმის სანაცვლოდ გათავისუფლდა.