სამართალი
შსს-მ დაადასტურა, რომ გვარამია-ახვლედიანის სკანდალური ჩანაწერი დაუმონტაჟებელი და ავთენტურია - არჩილ თალაკვაძე
საპარლამენტო უმრავლესობის ლიდერი, არჩილ თალაკვაძე, საქართველო შინაგან საქმეთა სამინისტროს წარმომადგენლის მიერ გაკეთებულ იმ განცხადებას გამოეხმაურა, რომლის მიხედვითაც, რუსთავი2-ის გენერალური დირექტორის, ნიკა გვარამიას და საქალაქო სასამართლოს ყოფილი თავმჯდომარის, მამუკა ახვლედიანის, ფარული ჩანაწერი დაუმონტაჟებელი და ავთენტურია.
განცხადება თალაკვაძემ საქართველოს პარლამენტში გამართულ საგანგებო ბრიფინგზე გააკეთა.
უმრავლესობის ლიდერი გვარამიას და ნაციონალურ მოძრაობას სასამართლოს მუშაობაში ჩარევასა და მოსამართლეებზე ზეწოლაში ადანაშაულებს.
„საქართველოს შს სამინისტრომ ოფიციალურად დაადასტურა, რომ გვარამია-ახვლედიანის სკანდალური ჩანაწერი დაუმონტაჟებელი და ავთენტურია. საზოგადოებას შევახსენებ, რომ საუბარია რუსთავი2-ის გენერალური დირექტორის, ნიკა გვარამიასა და ქალაქ თბილისის საქალაქო სასამართლოს ყოფილ თავმჯდომარეს, მამუკა ახვლედიანს შორის გამართულ შეხვედრაზე, რომელიც თვითონ გვარამიამ ჩაიწერა ფარულად და, სადაც ეს უკანასკნელი საქალაქო სასამართლოს მოქმედ თავმჯდომარეს სკანდალით გადადგომის სანაცვლოდ მილიონებს სთავაზობდა ქრთამის სახით.
შეგახსენებთ აგრეთვე, რომ გვარამია ნაწილობრივ აღიარებდა ჩანაწერის ნამდვილობას, მხოლოდ ამტკიცებდა, რომ ეს ჩანაწერი დამონტაჟებული იყო.
ამ დასკვნის თანახმად, სადაც დასტურდება, რომ ჩანაწერი ავთენტური და დაუმონტაჟებელია, იკვეთება საფუძვლიანი ვარაუდი, რომ იგი უხეშად ერეოდა სასამართლოს საქმიანობაში.
ახლა, როდესაც შეკითხვებს გაეცა დამაჯერებელი პასუხი, ნათელი ხდება ამ პოლიტიკური ისტერიის რეალური მიზეზებიც, რასაც უკანასკნელი დღეების განმავლობაში ვაკვირდებით ნაციონალური მოძრაობის მხრიდან. ცხადია, რომ მას შემდეგ, რაც გახმაურდა რუსთავი2-ის საქმესთან დაკავშირებული უზენაესი სასამართლოს მოსამართლეების, ალავიძისა და ქათამაძის საქმეებზე ყოფილი ხელისუფლების წარმომადგენლების მხრიდან სავარაუდო ზეწოლისა და მათი მოსყიდვის მცდელობის ფაქტები, ნაციონალურ მოძრაობას და ნიკა გვარამიას სხვა არაფერი დარჩენოდათ, თუ არა დაეგეგმათ და პოლიტიკურ სატელიტებთან ერთად განეხორციელებინათ საჯარო პროვოკაციების სერია, უზენაეს სასამართლოსთან და მერიასთან, მანამდე კი ეწარმოებინათ ცილისმწამებლური კამპანია მოსამართლეების მიმართ, რომლებზეც ზეგავლენა სავარაუდოდ ვერ მოახდინეს თვითონ“ - განაცხადა არჩილ თალაკვაძემ.
მისი თქმით, საქარველოს პროკურატურამ დაუყოვლებლივ უნდა მოახდინოს ამ ფაქტსი სამართლებრივი შეფასება და ბრალეული პირების გამოსავლეად ჩაატაროს სწრაფი და ეფექტიანი გამოძიება.
,,იმედი მაქვს ასევე, რომ სწრაფად იქნება გამოძიებული აქვს თუ არა ადგილი რეალურად მოსამართლე ახვლედიანის მხრიდან უკანონოდ მიღებული მილიონიანი ქონების უტიფარი ლეგალიზაციის ფაქტს, ვინაიდან თანხები, რომლებიც მის განკარგვაში იყო მოსამართლის 120 წლის ჯამური ხელფასია’’, - განაცხადა არჩილ თალაკვაძემ.
ნინო ექვთიმიშვილი