სამართალი

სიამაყის საფუძველს არ მაძლევს, რომ ვერ შევძელით გახმაურებულ საქმეებზე გადაწყვეტილების მიღება- კონსტანტინე ვარძელაშვილი

საკონსტიტუციო სასამართლოს ჯერ კიდევ მოქმედ მოსამართლეს კონსტანტინე ვარძელაშვილს სიამაყის საფუძველს არ აძლევს ის ფაქტი, რომ საკონსტიტუციო სასამართლოს პლენუმმა გახმაურებულ საქმეებთან დაკავშირებით გადაწყვეტილება ვერ მიიღო.

ამის შესახებ ვარძელაშვილმა მედიას განუცხადა.

„ჩემთვის ძალიან საამაყოა ყველა გადაწყვეტილება რომელშიც მონაწილეობას ვიღებდი, ჩემს კოლეგებთან ერთად. თუმცა სიამაყის საფუძველს არ მაძლევს ბოლო მოვლენები, რომლებიც განვითარდა სასამართლოში. მათ შორის ისიც, რომ პლენუმმა ვერ შეძლო ვერც ერთ, ძალიან მნიშვნელოვან საქმეზე გადაწყვეტილების მიღება. რა თქმა უნდა, ეს პირველ რიგში, ეხება მსჯავრდებული პირების სარჩელს, კაბელების საქმეს ვგულისხმობ და გიგი უგულავას საქმეს. რუსთავი 2-ის ვერც ერთი საქმე არ იქნა გადაწყვეტილი, რომელიც განხილული იქნა პლენუმის მიერ, მიუხედავად იმისა, რომ ამის შესაძლებლობა რა თქმა უნდა არსებობდა“,-განაცხადა ვარძელაშვილმა.

შეგახსენებთ, რომ საკონსტიტუციო სასამართლოს ოთხ მოსამართლეს: ქეთევან ერემაძეს, ოთარ სიჭინავას, კონსტანტინე ვარძელაშვილსა და თავად გიორგი პაპუაშვილს უფლებამოსილების ვადა დღეს ეწურებათ.

მონიკა დავლიანიძე