პოლიტიკა

სხვაობა სამოქალაქო რეესტრისა და სტატისტიკის დეპარტამენტის მონაცემებს შორის წინასაარჩევნოდ სერიოზულ გაუგებრობას წარმოშობს - მამუკა კაციტაძე

`ახალი მემარჯვენეების~ ლიდერის მამუკა კაციტაძის განცხადებით, ამომრჩეველთა რაოდენობის შესახებ სტატისტიკის სამსახურის მიერ გამოქვეყნებულ მონაცემებსა და სამოქალაქო რეესტრის მონაცემებს შორის 651 000 კაციანმა სხვაობამ შესაძლოა სერიოზული პრობლემები შექმნას 2016 წლის საპარლამენტო არჩევნების ლეგიტუმურობასთან დაკავშირებით. ამის შესახებ კაციტაძემ `ახალი მემარჯვენეების~ ოფისში გამართულ საგანგებო ბრიფინგზე განაცხადა და ხელისუფლებას მოუწოდა, სიცხადე შეიტანოს ვითარებაში.

,,სამოქალაქო რეესტრის მონაცემებით, 1 მაისის მდგომარეობით საქართველოში 3 530 000 ამომრჩეველია დარეგისტრირებული. სტატისტიკის დეპარტამენტის მონაცემებით საქართველოში სულ 2 977 000 ამომრჩეველია. განსხვავება ამომრჩეველთა რაოდენობაში სამოქალაქო რეესტრის და სტატისტიკის სამსახურის მონაცემებს შორის - 651 000 ამომრჩეველი - საკმაოდ დიდი სხვაობაა და 2016 წლის საპარლამენტო არჩევნების წინ სერიოზულ გაუგებრობას წარმოშობს“, - განაცხადა მამუკა კაციტაძემ. მისი თქმით, ამომრჩეველთა სიაში არ არის რეგისტრაციის მისამართიდან მოხსნილი 98 000 ამომრჩეველი.

,,ეს ძირითადად საპროტესტო ელექტორატია, რომელმაც ბანკის ვალების და სხვა ფინანსური პრობლემების გამო ბინა დაკარგა და რეგისტრაციის მისამართიდან მოიხსნა. სწორედ ამ მიზეზით, რომ ეს საპროტეტსო ელექტორატი იყო, ამომრჩეველთა სიიდან ისინი ამოიღო ნაციონალურმა მოძრაობამ 2012 წელს, ახლა იგივე მიზეზით მათ ხმის უფლებას ართმევს დღევანდელი ხელისუფლება, “- განაცხადა ახალი მემარჯვენეების ლიდერმა და ხელისუფლებას მოუწოდა, საქართველოს საარჩევნო კოდექსის 185-ე მუხლში შეიტანონ ცვლილება და რეგისტრაციის ადგილიდან მოხსნილ ამომრჩეველს დაუბრუნდეს საარჩევნო ხმის უფლება, ასევე, ცდომილება სამოქალაქო რეესტრისა და სტატისტიკის სახელმწიფო სამსახურის მიერ გამოქვეყნებულ ამომრჩეველთა რაოდენობას შორის აღმოიფხვრას საცხოვრებელი ადგილის მიხედვით მათი დამატებით გადამოწმების გზით და ამომრჩეველთა სიის მიმართ სანდოობის უზრუნველყოფის მიზნით, პროცესებში წარიმართოს საზოგადობისა და ჟურნალისტებსი ჩართულობით.

მარი ნამგალაძე