საზოგადოება

სკოლადამთავრებული განაცხადის შევსებიდან 10 სამუშაო დღეში უფასოდ მიიღებს ატესტატს

დღეიდან სკოლადამთავრებულები ატესტატის აღებას შეძლებენ საქართველოს იუსტიციის სახლში, სერვისების განვითარების სააგენტოს ფილიალებსა და საზოგადოებრივ ცენტრებში. ამის შესახებ იუსტიციის სახლის აღმასრულებელმა დირექტორმა გივი აზნაურაშვილმა და სახელმწიფო სერვისების განვითარების სააგენტოს თავმჯდომარემ სოსო გიორგაძემ განაცხადეს დღევანდელ პრესკონფერენციაზე.

ატესტატის მისაღებად აბიტურიენტმა განაცხადი უნდა შეავსოს იუსტიციის სახლში. დოკუმენტი განაცხადის შეტანიდან 10 სამუშაო დღეში უფასოდ გაიცემა.

ატესტატის დაჩქარებული წესით აღების შემთხვევაში, სკოლადამთავრებულს საფასურის გადახდა მოუწევს. მაგალითად, თუ აბიტურიენტს ატესტატის აღება განაცხადის შევსებიდან ერთ დღეში სურს, 50 ლარის გადახდა მოუწევს, 2 დღეში - 40 ლარის, 3 დღეში - 30 ლარის, თუკი 5 დღეში - 20 ლარის.

განაცხადის შევსება ყველა აბიტურიენტს შეუძლია ყოველ სამუშაო დღეს 9-დან 18 საათამდე. თუკი სკოლადამთავრებულს სურს, რიგს თავი აარიდოს, იუსტიციის სახლი ურჩევს მას, 16-დან 18 საათამდე გამოცხადდეს.

წელს 12 კლასდამთავრებული 39 000-მდე აბიტურიენტია რეგისტრირებული.

ანა მებურიშვილი