საზოგადოება

სოფიო კილაძეს საპარლამენტო აპარატის თანამშრომელი დისკრიმინაციაში ადანაშაულებს - სასამართლო ორშაბათს გაიმართება

ადამიანის უფლებათა დაცვის საპარლამენტო კომიტეტის თავმჯდომარეს, სოფიო კილაძეს აპარატის მოქმედი თანამშრომელი სასამართლოში უჩივის. ელგა ფოლადაშვილი დეპუტატს დისკრიმინაციაში ადანაშაულებს.

როგორც მან რუსთავი 2-ს განუცხადა, კილაძე მას სამსახურის დატოვება მოსთხოვა. დეპუტატმა ამის მიზეზად იურისტის დიპლომის არქონა დაასახელა.

„მითხრა, რომ ეს ჩემი კომიტეტია და გადაწყვეტილებებს ვიღებ მეო. ამაზე ჩემი პასუხი იყო ძალიან მარტივი, რომ ეს არ არის მისი კომიტეტი, ეს არის პარლამენტის კომიტეტი. ამის შემდგომ მისგან იყო ასეთი სვლა, რომ, თუ მე ჩემი ნებით არ დავწერდი განცხადებას, ის მე დისციპლინურ პასუხისგებაში მიმცემდა. კითხვაზე, თუ რის საფუძველზე გააკეთებდა ამას, მითხრა, რომ შენ არ ხარ იურისტი, ისეთ დავალებებს დაგავალებ, რომელსაც, როგორც პროფესიით არაიურისტი ადამიანი, ფიზიკურად ვერ გააკეთებს.

არის რაღაცა თემები, რაშიც მე ფიზიკურად ვერ შევალ ერთი მარტივი მიზეზის გამო, ამისი არც კომპეტენცია არ მაქვს, რადგან მე არ გახლავარ იურისტი და მეორე, საჯარო მოხელეობა გარკვეულ შეზღუდვებს მიწესებს“, - თქვა ფოლადაშვილმა.

მისივე ნააბობიდან ირკვევა, რომ სამსახურიდან წასული თანამშრომლების ნაცვლად კილაძემ „მისთვის სასურველი პირები“ მოიყვანა.

„ის ადამიანები, ვინც განცხადებები დაწერეს იმის შიშით, რომ საყვედური არ მიეღოთ, ან პირიქით, საყვედური მიიღეს, მაგრამ ამის ნაცვლად დაწერეს განცხადებები, წავიდნენ. ეს ადგილები დაიკავეს მისთვის [კილაძისთვის] სასურველმა ადამიანებმა“, -აღნიშნა ფოლადაშვილმა.

სასამართლო პროცესი ორშაბათისთვისაა დანიშნული. მოსარჩელე მხარის ინტერესებს ახალგაზრდა იურისტთა ასოციაცია იცავს. არასამთავრობო ორგანიზაციის იურიდიული დახმარების ცენტრის კოორდინატორის, ნონა ქურდოვანიძის განცხადებით, საია სასამართლოსგან დისკრიმინაციის დადგენას მოითხოვს. მისივე თქმით, როცა ფოლადაშვილი სამსახურში აიყვანეს, მოთხოვნებს შორის არ ფიგურირებდა იურისტის დიპლომი და დამსაქმებელმა იცოდა, რომ მოსარჩელე მხარე მას არ ფლობდა.

ანა მებურიშვილი