ეკონომიკა
სოფლის მეურნეობის, კვების მრეწველობის, გადამამუშავებელი და შემფუთველი ტექნოლოგიების გამოფენა გაიმართება
30 ნოემბრიდან 2 დეკემბრის ჩათვლით, საგამოფენო ცენტრის „ექსპო ჯორჯია“ ტერიტორიაზე სოფლის მეურნეობის, კვების მრეწველობის, გადამამუშავებელი და შემფუთველი ტექნოლოგიების მე–16 საერთაშორისო გამოფენა Agro/Food/Drink/Tech გაიმართება. გამოფენა მოიცავს მე-6, მე-11 პავილიონებსა და გარე სივრცეს.
Agro/Food/Drink/Tech ორგანიზატორი: საგამოფენო ცენტრი „ექსპო ჯორჯია“
Agro/Food/Drink/Tech მხარდამჭერი: საქართველოს სოფლის მეურნეობის სამინისტრო და ევროკავშირის პროგრამა ENPARD.
საგამოფენო სტენდებზე წარმოდგენილია 11 ქვეყნის (საქართველო, უკრაინა, სომხეთი, პოლონეთი, იტალია, უნგრეთი, ნიდერლანდები, პორტუგალია, გერმანია, ლიტვა, თურქეთი) 150-მდე კომპანია.
Agro/Food/Drink/Tech 2016-ზე წარმოდგენილი იქნება სასოფლო–სამეურნეო ტექნიკა, მანქანა–დანადგარები, ტარა და შესაფუთი მასალები, სასათბურე მეურნეობის ტექნოლოგიები და აღჭურვილობა, სარწყავი სისტემები, ლაბორატორიული აღჭურვილობა, სარგავი და სათესლე მასალები, სასუქი და პესტიციდები, საკონსულტაციო მომსახურება და თანამედროვე ტექნოლოგიები, ასევე სასმელები და კვების პროდუქტები.
Agro/Food/Drink/Tech 2016-ის ფარგლებში, საქართველოს სოფლის მეურნეობის სამინისტროს და ევროკავშირის პროგრამის ENAPRD-ის მხარდაჭერით, მე-6 პავილიონში, 40-მდე სასოფლო-სამეურნეო კოოპერატივის (საქართველოს თითქმის ყველა რეგიონიდან) წარმოებული პროდუქციის - თაფლი და მეფუტკრეობის პროდუქტები, ჩაი, თხილი, ჩირი, ჩურჩხელა, ყველი, მწვანილი, ბოსტნეული, ხილი - გამოფენა-გაყიდვა გაიმართება.
Agro/Food/Drink/Tech 2016-ზე, საქართველოს სოფლის მეურნეობის სამინისტროსა და ,,ექსპო ჯორჯიას“ ორგანიზებით, გასული წლების მსგავსად, დაესწრებიან მცირე ფერმერები საქართველოს ყველა რეგიონიდან. მათ საშუალება ექნებათ დაამყარონ პირდაპირი კონტაქტები მეწარმეებთან, გაეცნონ ახალ ტექნოლოგიებს და სოფლის მეურნეობის სექტორში მიმდინარე სიახლეებს.
სოფლის მეურნეობის, კვების მრეწველობის, გადამამუშავებელი და შემფუთველი ტექნოლოგიების მე–16 საერთაშორისო გამოფენა 30 ნოემბერს 11:00 საათზე, საგამოფენო ცენტრის მე-11 პავილიონში გაიხსნება.
გამოფენას საქართველოს სოფლის მეურნეობის მინისტრი ლევან დავითაშვილი გახსნის.