კომენტარი

სოფო კილაძე ე.წ. მოსმენების გასაღების სუს-დან გატანას დაუშვებლად მიიჩნევს

საპარლამენტო უმრავლესობის წევრი, სოფო კილაძე არ იზიარებს მესამე სექტორის მოთხოვნას, ე.წ. მოსმენების გასაღების დამოუკიდებელი ორგანოსთვისთვის გადაცემის შესახებ.

დეპუტატი ფიქრობს, რომ სახელმწიფო უსაფრთხოების სამსახურიდან ე.წ. მოსმენების გასაღების გამოტანა დაუშვებელია.

„ჩვენთვის უმთავრესი პრინციპი არის, რომ მოვახერხოთ და შევინარჩუნოთ ისეთი პროექტი, რომელიც, ერთის მხრივ, მაქსიმალურად დაიცავს ადამიანის უფლებებს, მეორეს მხრივ, მაქსიმალურად უზრუნველყოფს იმ ძალიან მნიშვნელოვან სიკეთეს, რომელსაც უსაფრთხოება ქვია, მით უმეტეს, ისეთ რთულ რეგიონში, რომელშიც საქართველო იმყოფება და 21-ე საუკუნეში, სადაც ტერორიზმი დიდი გამოწვევაა მთელი მსოფლიოსთვის. ვერ მოვისმინე პასუხი, რომელი ქვეყნის გამოცდილება არის ისეთი, სადაც აბსოლუტურად დამოუკიდებელი ორგანო არის, რომელიც უზრუნველყოფს ისეთი სისტემის ფუნქციონირებას, რომელიც ამ ორივე სიკეთეს დაიცავს,“- განაცხადა სოფო კილაძემ.

ცნობისათვის: ფარული მოსმენების თემაზე შექმნილი სამუშაო ჯგუფი დღეს პირველ შეხვედრას გამართავს. პარლამენტის იურიდიულ კომიტეტში ჩანიშნულ შეხვედრას ძალოვანი და საგამოძიებო უწყებების და მესამე სექტორის წარმომადგენლები დაესწრებიან.

ნინო ექვთიმიშვილი