უახლესი ამბები
არქივი
მსოფლიო
სომხეთსა და აზერბაიჯანს შორის ომის მაღალი ალბათობა არსებობს, ჩვენ მზად უნდა ვიყოთ ომისთვის - სომხეთის პრემიერ-მინისტრი
სომხეთის პრემიერ-მინისტრის, ნიკოლ პაშინიანის განცხადებით, სომხეთსა და აზერბაიჯანს შორის ომის გაჩაღების მაღალი ალბათობა არსებობს და ამას გამოხატავს ბაქოს რიტორიკა. ამის შესახებ პაშინიანმა რუსულ „Эхо Москва“-სთან ინტერვიუში განაცხადა.
„ვთქვი, რომ ახლა ჩვენს რეგიონში ძალიან დაძაბული სიტუაციაა. ვგულისხმობდი აზერბაიჯანის აგრესიულ პოლიტიკას. ასევე არის ომის ძალიან მაღალი ალბათობა. ვთქვი, რომ ჩვენ უნდა მზად ვიყოთ ომისთვის“, -თქვა პაშინიანმა.
ჟურნალისტის კითხვაზე, არის თუ არა ყარაბაღის საკითხი რუსეთის ხელში, პაშინიანმა უპასუხა, რომ რუსეთს აქვს ყველა საშუალება აზერბაიჯანის შესაკავებლად.
მე და ყველა სომეხი და ყველა სომხეთში დარწმუნებული ვართ, რომ რუსეთს აქვს ყველა საშუალება, არ დაუშვას ახალი ესკალაციის კერა ჩვენს რეგიონში და შეაკავოს აზერბაიჯანი სომხეთსა და ყარაბაღზე თავდასხმისგან“, -თქვა პაშინიანმა.
კითხვაზე, როგორ უნდა შეაკავოს რუსეთმა აზერბაიჯანი, პაშინიანმა უპასუხა, რომ რუსეთს შეუძლია რეგიონში თავისი გავლენების გამოყენება.
„ვგულისხმობდი რუსეთის პოლიტიკურ, გეოპოლიტიკურ, ეკონომიკურ და უბრალოდ გავლენას, რუსეთის შესაძლო გავლენას ჩვენს რეგიონზე. ვფიქრობ, რომ კი, რუსეთს აქვს ყველა ბერკეტი, რომ არ დაუშვას ომი და ჩემთვის დაუჯერებელია, რომ რუსეთი უარს იტყვის ამ ბერკეტების გამოყენებაზე ომის თავიდან ასაცილებლად“, -დასძინა პაშინიანმა.