მსოფლიო
სომხეთში დემონსტრანტებმა საქართველოსთან დამაკავშირებელი გზატკეცილი გადაკეტეს
სომხეთში, სოფელ დსეხის მოსახლეობამ საქართველოსთან დამაკავშირებელი ვანაძორი-ბაგრატაშენის გზატკეცილი გადაკეტა. ამ ფორმით ისინი შეუერთდნენ ერევანსა და ქვეყნის სხვა ქალაქებში მიმდინარე „სამოქალაქო დაუმორჩილებლობის“ აქციებს.
რადიო თავისუფლების სომხური სამსახურის ინფორმაციით, პოლიცია დიდად არ ერევა სიტუაციაში, თუმცა შიგადაშიგ მოუწოდებს მოსახლეობას, გზა გახსნას.
გარდა ამისა ათასამდე მომიტინგემ ბაგრატაშენ-ნოემბერიანის გზის მონაკვეთი გადაკეტა.
დემონსტრანტებმა ასევე გადაკეტეს საერთაშორისო აეროპორტ „ზვარტნოცამდე“ მიმავალი ტრასა. ამის გამო ხალხი აეროპორტამდე ფეხით მიდის.
სომხეთში დღეს აქციები განახლდა. დემონსტრანტები ოპოზიციონერი ნიკოლ პაშინიანის ხელმძშღვანელობით სამთავრობო პარტიის წინააღმდეგ გამოდიან.
აქციები სომხეთში 13 აპრილს დაიწყო, რასაც მოჰყვა ორშაბათს სერჟ სარგსიანის გადადგომა პრემიერის თანამდებობიდან.