საზოგადოება
სპეცოპერაციის შედეგად დაკავებულია ერთი პირი, სამი კი ლიკვიდირებულია - სუს-ი
სახელმწიფო უსაფრთხოების სამსახურის საზოგადოებასთან ურთიერთობის სამსახურის ხელმძღვანელის, ნინო გიორგობიანის ინფორმაციით, ბერი გაბრიელ სალოსის ქუჩაზე ჩატარებული სპეცოპერაციის შედეგად დაკავებული დანაშაულებრივი დაჯგუფების 1 წევრი, ხოლო სამი ლიკვიდირებულია.
გიორგობიანის განცხადებით, დაიღუპა ერთი სპეცრაზმელი, ხოლო დაშავდა სუს-ის 2 და შსს-ის განსაკუთრებულ დავალებათა დეპარტამენტის 2 თანამშრომელი.
დანაშაულებრივ ჯგუფზე დაკვირვება ბოლო რამდენიმე კვირის განმავლობაში ხორციელდებოდა.
გიორგობიანმა მადლობა გადაუხადა ყველა სამართალდამცველს, ვინც იღებდა მონაწილეობას სპეცოპერაციაში.
„სახელმწიფო უსაფრთხოების სამსახურის კონტრტერორისტული ცენტრის მიერ თბილისში ბერი გაბრიელ სალოსის გამზირზე ჩატარებული სპეცოპერაცია დასრულებულია.
ჩატარებული ღონისძიების შედეგად დაკავებულია დანაშაულებრივი ჯგუფის ერთი წევრი, ხოლო სამი ლიკვიდირებულია. სამწუხაროდ, სპეცოპერაციის დროს დაიღუპა სუს-ის ერთი თანამშრომელი და დაიჭრა ორი, ამასთანავე დაჭრილია შსს-ის განსაკუთრებულ დავალებათა დეპარტამენტის 2 თანამშრომელი. სუს-ი სამძიმარს უცხადებს დაღუპულის ოჯახს.
არსებული ინფორმაციით, დანაშაულებრივი დაჯგუფების წევრები არ იყვნენ საქართველოს მოქალაქეები. ამ პირებთან მიმართებით დაკვირვება უკანასკნელი რამდენიმე კვირის განმავლობაში ხორციელდებდა, საერთაშორისო ანტიტერორისტული თანამშრომლობის ფარგლებში აღნიშნული ჯგუფის წევრების სრული იდენტიფიკაციის მიზნით მიმდინარეობს შესაბამისი ღონისძიბები დანაშაულებრივი კავშირების დადგენის მიზნით.
სუს-ის სახელით გვსურს მადლობა გადავუხადოთ ყველა იმ თანამშრომელს, სპეცრამელსა და პოლიციელს, ვინც საკუთარი სიცოცხლის რისკის ფასად დაიცვა ჩვენი მოქალაქეები.
ამ რთული ვითარების გადატანისთვის მადლობას ვუხდით ჩვენს მოსახლეობას, რომ მათ ითანამშრომლეს სამართალდამცვლებთან“, - განაცხადა გიორგობიანმა.
სუს-ის პრესსამსახურმა ჟურნალისტებთან აღნიშნა, რომ მომდევნო დღეებში უწყება საზოგადოებას უფრო დეტალურ ინფორმაციას მიაწვდის.
ანა მებურიშვილი