პოლიტიკა
სპეცსამსახურები ცდილობენ განახორციელონ ზეწოლა კომისიის წევრებზე - არასაპარლამენტო ოპოზიცია ამომრჩეველს მიმართავს
ოპოზიციური პარტიების ლიდერთა საბჭო ამომრჩევლებს აქტიურობისკენ მოუწოდებს. 14 პარტიის წარმომადგენელთა მონაწილეობით პირველი საინფორმაციო ბრიფინგი გაიმართა.
საქართველოს ეროვნულ-დემოკრატიული პარტიის თავმჯდომარე, ბაჩუკი ქარდავა აცხადებს, რომ საუბნო კომისიებში სუს-ის წარმომადგენლები სხვადასხვა ორგანიზაციის სახელით არიან წარმოდგენილები.
„ისინი ქმნიან ისეთ განწყობას, რომ აკონტროლებენ ყველაფერს. მინდა, ქართულ საზოგადოებას ვუთხრა, რომ ისინი ვერაფერს ვერ აკონტროლებენ, თუ ვის მიეცით თქვენ ხმა. ამის გაგება მათ არ შეუძლიათ. ამ აქტივობებით, სპეცსამსახურები ცდილობენ განახორციელონ ზეწოლა კომისიის წევრებზე.
კიდევ ერთი ფაქტი - პოლიციის თანამშრომლები მასიურად ყველა უბანში და არამხოლოდ თბილისში მიდიან ოჯახებში და მეტნაკლებად კრიმინალური წარსულის ადამიანები გამოყავთ გარეთ, რათა მათ ზემოქმედება მოახდინონ ,,ქართული ოცნების“ სასარგებლოდ ამომრჩეველზე“ - განაცხადა ბაჩუკი ქარდავამ.
თავის მხრივ, "საქართველოს ევროპელი დემოკრატების” თავმჯდომარე, პაატა დავითაია აცხადებს, რომ უბნებიდან ხდება ფოტოების გადაგზავნა, ვინ რა ნომერი შემოხაზა.
გარკვეულ უბნებზე არამარკირებული ადამიანები შედიან და ასევე, დაფიქსირდა შემთხვევები, როდესაც პირადობის ნომერს იწერენ, ვინ მისცა ხმა.
საარჩევნო ბლოკ ”ერთობა ახალი საქართველოს” თბილისის მერობის კანდიდატი, გიორგი ვაშაძე აღნიშნავს, რომ რიგ შემთხვევაში საუბნო საარჩევნო კომისია ამომრჩეველს არ ეხმარება, რომ იპოვოს თავის თავი სიაში.
„როგორც ჩანს, დავალებაა, რომ რაც შეიძლება მეტად აუბნიონ ამომრჩეველს გზა,“ - განაცხადა გიორგი ვაშაძემ.
ამომრჩეველს მიმართა ,,დემოკრატიული მოძრაობის“ ლიდერმა ნინო ბურჯანაძემაც და ოპოზიციური პარტიების მხარდამჭერებს აქტიურობისკენ მოუწოდა.
,,ქართულმა ოცნებამ“ გააკეთა წარმოუდგენელი მობიზლიზაცია ადმინისტრაციული რესურსის. უბნებთან დგანან გამგებლები, ხელისუფლების წარმომადგენლები და ითვლიან თავიანთი მომხრეების მოსვლას. თქვენ თუ არ მოხვალთ, ოპოზიციური პოლიტიკური პარტიების მომხრეები, გამოვა, რომ არჩევნებში დაიწერება მხოლოდ ,,ქართული ოცნების“ და ბიძინა ივანიშვილის მიერ ნაყიდი და დაშინებული ადამიანების ხმები“, - განაცხადა ნინო ბურჯანაძემ.
ნინო ექვთიმიშვილი