საზოგადოება

სქართველოსა და რუსეთის საპატრიარქოები აფხაზეთის ეკლესიაში შექმნილი პრობლემების მოსაგვარებლად ერთობლივი კომისიის შექმნას აპირებენ

აფხაზეთში მოქმედ ეკლესიაში განხეთქილებაა. ამის შესახებ რუსეთის ეკლესიის საგარეო საქმეთა განყოფილების ხელმძღვანელმა, მიტროპოლიტმა ილარიონ ალფეევმა საქართველოს კათოლიკოს-პატრიარქ ილია მეორეს უთხრა და შესთავაზა ერტობლივი კომისიის შექმნა, რომელიც ამ პრობლემის აღკვეთაზე იმუშავებს.

„აფხაზეთში ახალი არაფერია. ის ჯგუფი, რომელმაც დაიპყრო ახალი ათონის მონასტერი და თავი გამოაცხადა თითქმის ავტოკეფალურ ეკლესიად, პოზიციებს ისევ ინარჩუნებს. დიახ, მათ შორის მოხდა განხეთქილება. ეს ჯგუფი ახლა მოიხსენიებს მსოფლიო პატრიარქს და მათ თავი მიტროპოლიად გამოაცხადეს . უნდა ვიფიქროთ, როგორ დავარეგულიროთ სიტუაცია. უწმინდეს პატრიარქ კირილესთან თქვენს ბოლო შეხვედრაზე გადაწყვიტეთ, რომ აფხაზეთში არსებულ სიტუაციაზე სამსჯელოდ სამუშაო ჯგუფს შევქმნიდით. ჩვენ მზად ვართ, შევუდგეთ მუშაობას, იმიტომ რომ იქ ბევრი პრობლემაა, რაც გადაჭრას საჭიროებს. თქვენ როგორ ფიქრობთ, რამდენი ადამიანი უნდა იყოს ამ ჯგუფში? ალბათ 2-3 საკმარისი იქნება. ველოდებით თქვენს პასუხს“, - უთხრა საქართველოს კათოლიკოს-პატრიარქს ილარიონ ალფეევმა.

ილია მეორეს თქმით, სიტუაცია სწრაფ რეაგირებას მოითხოვს.

„მე მიყვებოდნენ, რომ მოხდა განხეთქილება ამ ჯგუფსა, ბესარიონ აპლიასა და სხვებს შორის. სწორედ ამიტომ უნდა ვიჩქაროთ, დავარეგულიროთ სიტუაცია. აფხაზეთის წარმომადგენელი ჩამოვიდა აქ და მიამბო ამ განხეთქილების შესახებ. მან მითხრა, რომ შეიძლებოდა მოემზადებინა იქ ჩემი სახლი. მე აფხაზეთში სახლი მაქვს. როდესაც იქ ვცხოვრობდი, მაშინ შევიძინე. ნინოშვილის 13 ნომერში. ახლა იქ ვიღაც ცხოვრობს. როგორ ფიქრობთ, რამდენი ადამიანი უნდა შედიოდეს სამუშო ჯგუფში? ვფიქრობ, დიდი ჯგუფი საჭირო არ არის. ალბათ, სამი ადამიანი თითო მხრიდან. ჩვენ დავფიქრდებით და პასუხს შეგატყობინებთ“, – განაცხადა პატრიარქმა.

პატრიარქმა არ გამორიცხა საკუთარი წარმომადგენლის გაგზავნა აფხაზეთში.

„ჩვენ აფხაზეთიდან გვყავს ეპისკოპოსი გრიგოლი კაცია, აფხაზეთში კი არის პიროვნება, რომელიც ასევე გვარად კაციაა. ის რელიგიურ ორგანიზაციებთან პარლამენტისა და მთავრობის ურთიერთობას ხელმძღვანელობს. შეიძლებოდა მისი იქ გაგზავნა. ზოგიერთები გამოთქვამენ ასეთ აზრს, რომ როგორმე უნდა დავარეგულიროთ სიტუაცია აფხაზეთში“, – განაცხადა პატრიარქმა.