უახლესი ამბები
არქივი
საზოგადოება
სრულად ვეთანხმებით საზოგადოების ნაწილის მოთხოვნას ბრალდებულისთვის თავისუფლების უვადო აღკვეთასთან დაკავშირებით - პარლამენტის 8 დეპუტატის განცხადება გორში მომხდარ მკვლელობაზე
გორში, 8 წლის ნანა ბერიაშვილის სასტიკ მკვლელობასთან დაკავშირებით პარლამენტის 8 დეპუტატმა საგანგებო განცხადება გაავრცელა.
დეპუტატების თქმით, ისინი იზიარებენ საზოგადოების ნაწილის მოთხოვნას მკვლელობაში ბრალდებული პირისთვის თავისუფლების უვადო აღკვეთასთან დაკავშირებით.
„ვეხმაურებით გორში მცხოვრები 8 წლის ნანა ბერიაშვილის სასტიკი მკვლელობის ფაქტს. უპირველეს ყოვლისა, ვუთანაგრძნობთ ნანა ბერიაშვილის ოჯახს, გორში მცხოვრებ თითოეულ მოქალაქესა და სრულიად საქართველოს.
თითოეული ჩვენგანი სრულად იზიარებს საზოგადოების აღშფოთებას მომხდარის გამო და აცნობიერებს იმ პასუხისმგებლობას, რომელიც ხელისუფლებაში მყოფ ძალას აკისრია - დაიცვას ამ ქვეყნის თითოეული მოქალაქე და კანონის მთელი სიმკაცრით გაუსწორდეს მსგავს მოძალადეებს. ყოველივე ზემოაღნიშნულიდან გამომდინარე, მოქალაქეობრივი და ზნეობრივი პოზიციიდან გამომდინარე, სრულად ვეთანხმებით საზოგადოების დიდი ნაწილის მოთხოვნას, სასტიკი მკვლელის, წარსულში ყაჩაღობის მუხლით ნასამართლევი 34 წლის იაგო ნებიერიძისთვის თავისუფლების უვადო აღკვეთასთან დაკავშირებით. ამავდროულად, დარწმუნებული ვართ, რომ ძლიერი და დამოუკიდებელი ქართული სასამართლო მიიღებს სამართლიან და ადეკვატურ გადაწყვეტილებას!“, - წერია განცხადებაში, რომელსაც ხელს აწერენ პარლამენტის წევრები: კახაბერ ოქრიაშვილი, გოგი მეშველიანი, გურამ მაჭარაშვილი, კობა ლურსმანაშვილი, ანზორ ბოლქვაძე, ენზელ მკოიანი, თენგიზ ხუბულური, გიორგი ხატიძე.