საზოგადოება

ტაბიძის ქუჩაზე უკანონო მშენებლობა ვაკე-კუს ტბის საბაგირო გზას საფრთხეს უქმნის - არჩილ მშვენიერაძე

ტაბიძის ქუჩის მაცხოვრებლები თბილისის მერიას უკანონო მშენებლობის ნებართვის გაცემაში ადანაშაულებენ და აცხადებენ, რომ ტაბიძის ქუჩაზე მიმდინარე მშენებლობა ადგილობრივ მაცხოვრებლებსა და ვაკე-კუს ტბის საბაგირო გზას საფრთხეს უქმნის.

ამის შესახებ ტაბიძის ქუჩის მაცხოვრებლებმა და ადვოკატმა არჩილ მშვენიერაძემ დღეს გამართულ პრესკონფერენციაზე განაცხადეს.

,,2013 წელს თბილისის მერმა სპეციალური ზონალური ნებართვა გასცა. ამ აქტის თანახმად, ტაბიძის ვიწრო ქუჩაზე უნდა აშენდეს ისეთი შენობა, როგორიც შეიძლება აშენდეს მაღალი ინტენსივობის ზონაში. ტაბიძის ქუჩაზე ინტენსივობის კოეფიციენტი 1,5 მეათედს შეადგენს, ნებართვა კი გაცემულია ისეთი ნაგებობის აშენებაზედ, რომლის კოეფიციენტი 3,0-ია. გვაქვს ოთხი ავტორიტეტული ექსპერტის დასკვნა, რომლებიც აღნიშნავენ, რომ ტაბიძის ქუჩაზე, მსგავსი ტიპის შენობის აშენება გამოიწვევს მოძრაობაის პარალიზებას და შექმნის გაუსაძლის პირობებს. ჩვენ 2013 წელს გაცემული ნებართვა გავასაჩივრეთ და მოვახერხეთ მშენებლობის შეჩერება, თუმცა ვიდრე სასამართლო პროცესები დასრულდებოდა, ნებართვას ვადა გაუვიდა და 2016 წელს, ახალი ნებართვა გაიცა. ახლა, ამ მეორე ნებართვას ვასაჩივრებთ“, - განაცხადა არჩილ მშვენიერაძემ და აღნიშნა, შენობა ზუსტად ვაკის პარკის საზღვარზე უნდა აშენდეს, რითაც ვაკე-კუს ტბის საბაგირო გზა ტექნიკური უსაფრთხოებით ვეღარ გააგრძელებს ფუნქციონირებას, რაც საფრთხის შემცველია.

,,იმისათვის რომ ვაგონმა მშენებარე ობიექტის ადგილი უსაფრთხოდ გაიაროს, საჭიროა, ბაგირი ხელოვნურად აიწიოს, რამაც შესაძლოა, ადამიანების სიკვდილი გამოიწვიოს.

საექსპერტო დასკვნის თანახმად, თუ უკანონო ნაგებობა დასრულდა და საბაგირო გზა ტექნიკური პასპორტის მიხედვით ამუშავდა, ვაგონი დაეჯახება ნაგებობას. როდესაც ეს დასკვნა თბილისის მერიას წარვუდგინეთ, ამას სრული იგნორი მოჰყვა“, - აღნიშნა მშვენიერაძემ.

ადგილობრივების ინფორმაციით, აღნიშნულ მშენებლობას შპს ,,ჯიდი გრუპი" ახორციელებს, რომელსაც ხელისუფლების წარმომადგენლები ლობირებენ.

მარი ნამგალაძე