მსოფლიო
ტაილანდში გამოქვაბულში დარჩენილი 8 მოზარდისა და მათი მწვრთნელის ევაკუაცია განახლდა
ტაილანდის ჩრდილოეთით მდებარე ტჰამ ლუანგის მღვიმეში ჩარჩენილი მოზარდებისა და მათი საფეხბურთო მწვრთნელის საევაკუაციო პროცესი განახლდა.
მაშველები ოპერაციის ჩატარების გადაწყვეტილება იმის გამო მიიღეს, რომ არსებობს საფრთხე, რომ გამოქვაბულში წყლის დონემ აიწიოს.
გუშინ მყვინთავებმა მოახერხეს 4 ბიჭის გამოყვანა, ისინი საავადმყოფოში გადაიყვანეს. მათი ჯანმრთელობის მდგომარეობა დამაკმაყოფილებელია. მღვიმეში რჩება კიდევ 9 ადამიანი.
სამაშველო მისიის უფროსის ნარონგსაკ ოსოტანაკორნის თქმით, ამინდი და გარემოს სხვა ფაქტორები ოპერაციისთვის ხელსაყრელია.
„ჩვენ კიდევ უნდა გავიგოთ კარგი ამბები“, -დასძინა ოსოტანაკორნმა.
23 ივნისს 11-დან 17 წლამდე ასაკის ბავშვები თავის მწვრთნელთან ერთად გამოქვაბულში ჩარჩნენ უეცრად წამოსული ძლიერი წვიმის გამო, რომელმაც იქაურობა წყლით დაფარა. მოზარდები და მათი მწვრთნელი ბრიტანელმა მყვინთავებმა 9-დღიანი ძებნის შემდეგ აღმოაჩინეს გამოქვაბულის სიღრმეში, შესასვლელიდან ოთხი კილომეტრის მანძილზე.