სამართალი

თამარ ბაჩალიაშვილის საქმეში ახალი დეტალები იკვეთება

გაურკვეველ ვითარებაში გაუჩინარებული 23 წლის პროგრამისტის, თამარ ბაჩალიაშვილის საქმეში ახალი დეტალები იკვეთება, რის გამოც ადვოკატი ოთარ რამიშვილი გამოძიების ხელახლა დაწყებას ითხოვს. მისი თქმით, ბაჩალიაშვილების ოჯახის სახელით დღეს პროკურატურაში საჩივარი შეიტანეს, რითაც საქმის დახურვა გააპროტესტეს.

შალვა რამიშვილი მოითხოვს, რომ გამოძიება ხელახლა და იწყოს და ამას იმით ხსნის, რომ საქმეში ახალი დეტალები იკვეთება. მისი თქმით, საჩივარს სქრინი დაურთო თან, სადაც აღწერილია პირადი მიმოწერა თამარ ბაჩალიაშვილსა და მის მეგობარს შორის და ამ მიმოწერაში თამარი არსებულ საფრთხეზე საუბრობს როგორც მის მიმართ, ასევე მისი მეგობრის მიმართ.

შალვა რამიშვილი სწორედ ამ მიმოწერის ავთენტურობის დადგენას ითხოვს და ამბობს, რომ ამავდროულად, ის ახალი პირი, რომელმაც ადვოკატს მიმართა, მზადაა ჩვენება მისცეს და დეტალებზე გამოძიებასთან ისაუბროს.

შეგახსენებთ, საქართველოს პროკურატურამ თამარ ბაჩალიაშვილის საქმეზე გამოძიება 2020 წლის 17 დეკემბერს დახურა. პროკურატურის ვერსიით, ახალგაზრდა ქალის გარდაცვალების მიზეზი, რომლის ცხედარიც გაუჩინარებიდან 4 დღის შემდეგ, საკუთარ ავტომობილში იპოვეს სამანქანო გზის პირას, თვითმკვლელობაა. ოჯახი გამოძიების საწყისი ეტაპიდანვე ეჭვქვეშ აყენებს ამ ვერსიას და გამოძიების მიმართ ნდობა არაერთხელ დაუყენებია კითხვის ნიშნის ქვეშ.

თამარ ბაჩალიაშვილის საქმის გამოძიების დახურვამდე ცოტა ხნით ადრე გირაოს სანაცვლოდ გათავისუფლდა ამ საქმეზე მტკიცებულებების ფალსიფიკაციისთვის დაკავებული პირი, დავით ფურცხვანიძე - მან ადვოკატს მიაწოდა დამონტაჟებული გრაფიკული მასალა, რომელიც, მისი თქმით, სატელიტიდან გადაღებული კადრები იყო იმ დღეების, როდესაც თამარ ბაჩალიაშვილის სამძებრო ღონისძიებები მიმდინარეობდა.