საზოგადოება
თამარ ჩუგოშვილის აზრით, საქართველოს ვიზალიბერალიზაციის შეჩერების მექანიზმი არ ემუქრება
პარლამენტის ვიცე-სპიკერის თამარ ჩუგოშვილის განცხადებით, ქართული მხარე საკანონმდებლო კუთხით თუ სხვა მიმართულებით ყველა საჭირო ღონისძიებას გაატარებს, რათა საქართველოს მიმართ ვიზალიბერალიზაციის შეჩერების მექანიზმის გამოყენება არ დაუშვან.
მისი თქმით, საქართველომ უვიზო მიმოსვლის მიღებისთვის ყველაფერი გააკეთა და ხელისუფლება ყველა ზომას მიმართავს, რომ დარღვევები აღიკვეთოს.
„პირველ რიგში, საქართველომ ყველაფერი გააკეთა იმისთვის, რომ ევროპის ქვეყნებთან უვიზო მიმოსვლა მიგვეღო. ახლაც ყველაფერი კეთდება იმისთვის, რომ უვიზო მიმოსვლა შევინარჩუნოთ. მე არ ვფიქრობ, რომ ჩვენ შეჩერების მექანიზმის გამოყენება გვემუქრება, მაგრამ მოქალაქეები რომ დაგვეხმარონ, ბოროტად არ გამოიყენონ ეს უმნიშვნელოვანესი მონაპოვარი, არ დაარღვიონ უხეშად და ცუდი ფორმით, მათ შორის კრიმინალის ჩადენით, ევროპის სახელმწიფოებთან მიღწეული შეთანხმება, ეს ძალიან შეგვიწყობს ხელს. საქართველოს ხელისუფლება სხვადასხვა ზომებს მიმართავს, რომ ასეთი დარღვევები აღიკვეთოს და შესაბამისად, ჩვენს პარტნიორ ქვეყნებს ნაკლები პრობლემები შეექმნათ“, – აღნიშნა თამარ ჩუგოშვილმა.