საზოგადოება
თავდაცვის სამინისტროში არსებობდა ე.წ. „ვარსკლავიანი შტატები“, რომელთა მეშვეობით შტატების გაბერვა მიმდინარეობდა - ნუკრი გელაშვილი
თავდაცვის მინისტრის მოადგილის, ნუკრი გელაშვილის განცხადებით, უწყებაში არსებობდა ე.წ „ვარსკლავიანი შტატები“, რომელთა მეშვეობით ხდებოდა წლების განმავლობაში უწყების საშტატო ერთეულების გაბერვა.
როგორც გელაშვილმა „ტვ პირველის“ეთერში, თავდაცვის სამინისტროში განხროციელებული ოპტიმიზაციის საკითხის კომენტირებისას აღნიშნა, რეფორმა უკავშირდება ქვეყნის თავდაცვისუნარიანობის გაზრდასა და ნატოს სტანდარტებთან მაქსიმალურ მიახლოვებას.
მისივე თქმით, უწყების ბიუჯეტის 67% მიდიოდა სოციალურ საკითხებზე და ხელფასებზე, შესაბამისად ბიუჯეტის ძალიან მცირე ნაწილი რჩებოდა თავდაცვისუნარიანობის ამაღლებას.
გელაშვილმა აღნიშნა, რომ რეფორმის დაწყებამდე უწყება კონსულტაციებს მართავდა როგორც ნატოელ ექსპერტებთან, ისე საერთაშორისო პარტნიორებთან და სწორედ მათი აზრი იყო, რომ ბიუჯეტის სახელფასო და სოციალური ნაწილი ყოფილიყო 53%-ის ფარგლებში.
ამიტომ გადაწყდა, რომ რეორგანიზაცია ორ ნაწილს შეხებოდა, სამხედრო და სამოქალაქო პირებს.
„სამხედრო პირებთან მიმართებაში, უწყებაში არსებობდა ერთგვარი პირამიდა, რომელიც იყო აბსოლუტურად დარღვეული. ანუ, მაღალი წოდების ადამიანები, ვთქვათ პოლკოვნიკები, ვიცე-პოლკოვნიკები -იყვნენ არათანაზომიერად დიდი ოდენობით და ფაქტიურად ეს პირამიდა იღებდა სხვა ფორმას. სამოქალაქო პირების შემთხვევაში - არსებობდა ე.წ „ვარსკვლავიანი შტატები“. ამ საშტატო ერთეულზე შეიძლება დანიშნულიყო ადამიანი როგორც წოდების, ისე წოდების გარეშე და ამას არ სჭირდებოდა საკვალიფიკაციო მოთხოვნები. ეს იყო მუდმივი პროცესი, ანუ მინისტრების ყოველი ცვლილების შედეგად ამ „ვარსკვლავიან შტატებს“ ემატებოდნენ გარკვეული ადამიანები. ახალი მინისტრის მოსვლის შემდეგ ეს ადამიანები რჩებოდნენ და პლიუს ემატებოდა კიდევ ადამიანთა გარკვეული ოდენობა. გადაწყვეტილება, რომელიც იქნა მიღებული, ამაზე ხმამაღლაც კი საუბრობდნენ და ყველა თანმხდებოდა, რომ თავდაცვის სამინისტროში გარკვეული რეორგანიზაცია იყო ჩასატარებელი, რომ საშტატო ერთეულები იყო ხელოვნურად გაბერილი. ყველას აზრის ერთობლიობის თავმოყრა მოხდა მხოლოდ ამჟამად. შეიძლება ითქვას, რომ არავის არ გაურისკავს ადამიანების გაშვება თავდაცვის სამინისტროდან. ვიმეორებ, ეს გადაწყვეტილება ემსახურება თავდაცვისუნარიანობის ამაღლებას, რომ ჩვენი ჯარი ნატოს სტანდარტებთან მივიყვანოთ“,-განმარტა მინისტრის მოადგილემ.
მონიკა დავლიანიძე