პოლიტიკა
„თავისუფალი საქართველო“ “ქართული ოცნების” მიერ ინიცირებული საკანონმდებლო პროექტის უკან რუსეთში ბიზნეს-ინტერესებს ხედავს
პარტია „თავისუფალი საქართველო“ მიიჩნევს, რომ ოკუპირებული ტერიტორიების შესახებ “ქართული ოცნების” მიერ ინიცირებული საკანონმდებლო პროექტი გაუმართლებელია.
„ჩვენ მხარს ვუჭერდით კანონპროექტის მიღებას 2012-2013 წლებში, თუკი ეს პროექტი იქნებოდა განხილული როგორც რუსეთ-საქართველოს ურთიერთობების მოწესრიგების ნაწილი, რასაც მოჰყვებოდა საპასუხო, შემხვედრი ნაბიჯები.
სამწუხაროდ, გასული 4 წლის მანძილზე არანაირი პოლიტიკური დიალოგი ოკუპირებული ტერიტორიების ბედის შესახებ მოსკოვსა და თბილისს შორის არ დაწყებულა. მეტიც, ურთიერთობების გაუმჯობესების ნაცვლად გაგრძელდა ე.წ. მცოცავი ოკუპაცია და სეპარატისტების მიერ ეთნიკური ქართველების უფლებების შელახვა ოკუპირებულ ტერიტორიებზე, რაც რეაგირების გარეშე დარჩა როგორც საქართველოს ისე რუსეთის მთავრობების მხრიდან“, _ აცხადებს პარტია და დასძენს, რომ ამ პირობებში, განსაკუთრებით გოგა ოთხოზორიას მკვლელობის, აგრეთვე აფხაზეთის სეპარატისტულ რეჟიმსა და მოსკოვს შორის დაგეგმილი სამხედრო ხელშეკრულების ხელმოწერის ფონზე, ცალმხრივი დათმობა შეიძლება განხილულ იქნეს როგორც კაპიტულანტური აქტი.
პარტია მიიჩნევს, რომ ოკუპირებული ტერიტორიების შესახებ “ქართული ოცნების” მიერ ინიცირებული საკანონმდებლო პროექტს არა აქვს პოლიტიკური ახსნა, მისი საფუძველი შეიძლება იყოს მხოლოდ არაფორმალური მმართველის ბიზნეს-ინტერესები რუსეთის ფედერაციაში.