პოლიტიკა

,,თავისუფალი დემოკრატების’’ აღმასრულებელი მდივანი თამარ კეკენაძე გახდა

,,თავისუფალი დემოკრატების’’ ლიდერმა, ირაკლი ალასანიამ პარტიის აღმასრულებელი მდივნის თანამდებობაზე თამარ კეკენაძე წარადგინა.

როგორც ალასანიამ პარტიის ოფისში გამართულ ბრიფინგზე აღნიშნა, კეკენაძე ,,თავისუფალ დემოკრატებს’’ 2015 წელს შეუერთდა.

,,მინდა წარმოგიდგინოთ პარტიის ახალი აღმასრულებელი მდივანი ქალბატონი თამარ კეკენაძე. თამარის გამგებლობაში შევა როგორც რეგიონალური, ასევე საქალაქო და რაიონული ,,თავისუფალი დემოკრატების’’ სტრუქტურების დახვეწა-ორგანიზება და განვითარება’’, - განაცხადა ირაკლი ალასანიამ.

თავის მხრივ, როგორც თამარ კეკენაძემ აღნიშნა, პარტიაში შესვლამდე ის თავდაცვის სამინისტროში მუშაობდა, თუმცა ე.წ. კაბელების საქმეზე უდანაშაულო ადამიანების დაკავების გამო, უწყებიდან წამოსვლა გადაწყვიტა.

,,2012-2015 წლებში ვიყავი თავდაცვის სამინისტროს მთავარი სამოქალაქო წარმომადგენელი ნატო-ში და ევროკავშირში. ჩემთვის ამოსავალი წერტილი, რატომაც დავტოვე თავდაცვის სამინისტრო, იყო ის გადაწყვეტილება, რაც უსამართლოდ იქნა მიღებული იმ 5 უდანაშაულო ადამიანის მიმართ, რომლებიც დააკავეს. სწორედ ამიტომ, როდესაც დავინახე ასეთი უსამართლო დამოკიდებულება ამ გუნდის მიმართ, გადავწყვიტე წამოვსულიყავი საჯარო სექტორიდან და შევერთებოდი ამ გუნდს’’, - განუცხადა ჟურნალისტებს თამარ კეკენაძემ.