პოლიტიკა
თბილისელების ჯიბიდან ამოღებული პარკირების სააბონენტო საფასურის და ჯარიმების 60% თბილისის ბიუჯეტში ირიცხება - თენგიზ შერგელაშვილი
„შენების მოძრაობის“ თბილისის მერობის კანდიდატის, თენგიზ შერგელაშვილის განცხადებით, პარკირების სააბონენტო საფასურისა და ჯარიმების შედეგად თბილისის ბიუჯეტში 2014 წლიდან დღემდე 21 000 000 ლარზე მეტი შევიდა.
ამის შესახებ პარკირების პრობლემასთან დაკავშირებით სპეციალურ ბრიფინგზე განაცხადა.
„საზოგადოებამ აუცილებლად უნდა იცოდეს, რომ თბილისელების ჯიბიდან ამოღებული პარკირების სააბონენტო საფასურის და ჯარიმების 60% თბილისის ბიუჯეტში ირიცხება. 2014 წლიდან დღემდე თბილისის ბიუჯეტში ამ გზით შესულია 21 000 000 ლარზე მეტი. ამასთან, აღსანიშნავია, რომ ადგილობრივი თვითმმართველობის კოდექსით ავტოსატრანსპორტო საშუალებების პარკირების ადგილებით უზრუნველყოფა და დგომის წესებით რეგულირება უშუალოდ თბილისის მერიის ვალდებულებაა, ხოლო თავად 10- ლარიანი ჯარიმის ოდენობა დადგენილია ადმინისტრაციულ სამართალდარღვევათა კოდექსით, რომელსაც საქართველოს პარლამენტი ადგენს“,-განაცხადა მერობის კანდიდატმა.
მისივე თქმით, ამ ყველაფრის ფონზე წლების განმავლობაში ხელისუფლება ხელს მხოლოდ „სითი პარკისკენ“ იშვერს და ცდილობს, საკუთარ პასუხისმგებლობას თავი აარიდოს.
შერგელაშვილი მიმართავს „ქართულ ოცნებას“ და მერობის კანდიდატ კახა კალაძეს, საზოგადოებას ინფორმაცია მიაწოდონ, განმარტონ თუ რას მოხმარდა აღნიშნული თანხები და რა გაკეთდა იმისათვის, რომ თბილისში პარკირების ადგილები გაზრდილიყო.
მონიკა დავლიანიძე