საზოგადოება

თბილისი-ბაქოს ავტომაგისტრალზე მომხდარი ავარიის დროს დაშავებულმა პაციენტებმა კლინიკა დატოვეს

თბილისი-ბაქოს ავტომაგისტრალზე მომხდარი ავტოსაგზაო შემთხვევის შედეგად დაშავებულთაგან, აზერბაიჯანის ერთ-ერთი კლინიკა ყველა პაციენტმა დატოვა.

გუშინ მომხდარი ავარიის დროს საავადმყოფოში ავტობუსის მძღოლი, ექსკურსიის გიდი და მგზავრები გადაიყვანეს, სულ 20-მდე ადამიანი, თუმცა, ამ დროისთვის ყველა მათგანის ჯანმრთელობის მდგომარეობა სტაბილურია.

ტურის ხელმძღვანელის, გიორგი ბოკუჩავას ინფორმაციით, მძღოლს, რომელსაც სხეულის სხვადასხვა ხარისხის დაზიანება ჰქონდა მიღებული, აზერბაიჯანიდან საქართველოში დღეს გადმოიყვანენ. ჯგუფის წევრები კი, რომლებსაც ნაკაწრი დაზიანებები და მსუბუქი დაჟეჟილობები აღენიშნებოდათ, თავს კარგად გრძნობენ და ბაქოში ექსკურსიას აგრძელებენ.

ავარიის დროს სამგზავრო ავტობუსში 60 ადამიანი იმყოფებოდა, მათ შორის, გორის და ხაშურის სკოლების მე-12 კლასის მოსწავლეები, მათი პედაგოგები და მშობლები.