საზოგადოება

თბილისი UEFA-ის სამიტს უმასპინძლებს

თბილისი 1-2 მარტს უეფას საერთაშორისო სამიტ UEFA GROW-ს უმასპინძლებს, რომლის განსახილველი თემა იქნება აღმოსავლეთ ევროპაში ფეხბურთის მასობრიობის ზრდა. - ამის შესახებ ინფორმაციას საქართველოს ფეხბურთის ფედერაცია ავრცელებს.

განცხადების თანახმად, საქართველო სამიტის მასპინძელი გახდა ქვეყნის მიერ ფეხბურთის დაინტერესების ზრდის კუთხით მიღწეული შედეგების გამო.

„2016 წელს საქართველოს ფეხბურთის ფედერაციისა და უეფას მხარდაჭერით განხორციელებული პროექტების შედეგად, დარეგისტრირებულ ფეხბურთელთა რიცხვი 7000-ით გაიზარდა, რაც უეფამ ფეხბურთის მასობრიობისაკენ გადადგმულ მნიშვნელოვან ნაბიჯად შეაფასა. საქართველოში განხორციელებული პროექტებისა და შედეგების გაანალიზების შემდეგ, ევროპული ფეხბურთის მმართველი ორგანიზაციის გადაწყვეტილებით, სწორედ საქართველო იქნა შერჩეული სამიტის მასპინძლად“, - წერია განცხადებაში.

იგეგმება საქართველოს ფეხბურთის ფედერაციის პრეზიდენტის, ლევან კობიაშვილის გამოსვლა, რომელიც ისაუბრებს გრძელვადიან პროექტებზე, რომლებიც საქართველოში „UEFA GROW 2020“-ის ფარგლებში განხორციელდება.

საერთაშორისო ფორუმი უეფას ორგანიზებითა და ევროსაბჭოს მხარდაჭერით გაიმართება. მასში მიიღებენ მონაწილეობას უეფას წარმომადგენლები, საქართველოსა და აღმოსავლეთ ევროპის 13 ქვეყნის ფეხბურთის ფედერაციის პრეზიდენტები და გენერალური მდივნები, სპორტის საერთაშორისო ექსპერტები, ასევე მონაწილე ქვეყნების სპორტისა და განათლების მინისტრები.

განცხადების თანახმად, UEFA GROW - სამიტი თბილისში ახალი ფორმატით ჩატარდება.

ანა მებურიშვილი