საზოგადოება

თბილისის მერია „სითი პარკთან“ დადებულ ხელშეკრულებას წყვეტს

თბილისის მერია კომპანია „სითი პარკთან“ დადებულ ხელშეკრულებას 10 აპრილიდან წყვეტს.

როგორც თბილისის მერმა კახა კალაძემ დღევანდელ ბრიფინგზე განაცხადა, აღნიშნული გადაწყვეტილების მიზეზი კომპანიის მხრიდან უპასუხისმგებლობა და საჯარო უფლებამოსილებების არასათანადოდ შესრულებაა.

კალაძის თქმით, არაერთი გაფრთხილების მიუხედავად, კომპანია არ ასრულებს მასზე დაკისრებულ მოვალეობებს, რაც მოქალაქეების უფლებების შელახვისა და პარკირების მართვის სფეროში სისტემური პრობლემების შექმნის მიზეზი გახდა.

„აქედან გამომდინარე, მივიღეთ გადაწყვეტილება, 2018 წლის 10 აპრილიდან, შევწყვიტოთ კომპანია „სითი პარკთან“ დადებული ხელშეკრულება“, – განაცხადა კახა კალაძემ.

მისივე თქმით, კონტრაქტის გაუქმების შემდეგ, „სითი პარკის“ ფუნქციებს, პარკირების ახალი სისტემის ჩამოყალიბებამდე, თბილისის სატრანსპორტო კომპანია განახორციელებს.