საზოგადოება

თბილისის მერიამ სითი პარკს დარღვევებზე მიუთითა და გამოსწორებისთვის ვადა მისცა - ირაკლი ბენდელიანი

თბილისის მერიამ სითი პარკს დარღვევებზე მიუთითა და გამოსწორებისთვის ვადა მისცა, რომლის შეუსრულებლობის შემთხვევაში უწყება შესაბამისად იმოქმედებს, - განაცხადა თბილისის მერის მოადგილემ, ირაკლი ბენდელიანმა რადიო ”პალიტრის” გადაცემა ”შუადღის სტუდიის” ეთერში.

”არსებობს გარკვეული სახის დარღვევები ”სითი პარკის” მხრიდან. ჩვენს მიერ ამ დარღვევებზე მითითება იქნა გაკეთებული, განისაზღვრა ვადა, რომელშიც კომპანიამ უნდა გამოასწოროს დარღვევები, ხოლო იმ შემთხვევაში, თუ ამას მათი მხრიდან არ მოყვება რეაგირება, შემდგომ ნაბიჯებს დავგეგმავთ კანონმდებლობის შესაბამისად”, - განაცხადა ბენდელიანმა.

გადაცემის წამყვანის კითხვაზე, შესაძლოა, თუ არა კომპანია ქალაქიდან გაუშვან, ბენდელიანმა უპასუხა, რომ ”არ გამოირიცხება არც ერთი პასუხისმგებლობის საკითხი”.

”თუკი ხელშეკრულების შეწყვეტაზე მიდგება საქმე, ეს იქნება სასამართლოს გადასაწყვეტი და ვიმოქმედებთ იმის მიხედვით, რასაც სასამართლო გადაწყვეტს”, - აღნიშნა ბენდელიანმა.